anmeldung

HASAN KAYA/STENBOL

BIMEŞIN

Bimeşin ber bi şînahiya ewran ve. Bila aso mîna qalibek sabûna zeytûnî ya Dîlokê ji ber lingên we bişemite. Bimeşin ber bi şînahiyê ve. Lewre pêleke dûdirêje ku bextiyarî şeveder e li êla we. We çav pê neketiye, bi rojên ku dilxweşî di bîbikên çavên we de hatiye daçikandin. Rahêjin mistek bextiyarî û bi nêrgizên dilşkestî re bîhn bikin û li ba bikin, bila çavên dilê we bibin şahidê bostek xweşî...Çimkî we zû ve dil kul e.

Pişta xwe bidine siya reşiya ku sedan sal e, li ser keskesora me mîna lepên celadekî digere. Bila kêlîkek be jî, destên tirsa nerindiyê ji pêsira we vekişayî be. Ez jî nizanim ku ev çiqas wext e, dilê we mîna gulokeke ji pembû di devên kêvjalî de tê cûtin. Bila dilopek be jî dilikê we binive...

Singên konê xwe yê dagerkirî li keviya bajarê azadiyê bikutin. Singên konê xwe bikutin û benê wî bişidînin da ku roj carek be jî weke kenê zarokeke kejî li ser mirada dilê we bihile. Bila hilbe roj li ser xeyalên temenê we lê ciwanî mîna caniya hespekî rehwan e. Dibe ku careke din dîmenê sirûşta çavteng neyê bexişandin yek car be jî ji bo çavên we yên keserkûr...

Çend nîr di ser re bihurîn lê hê jî kilîda deng û devê te mîna tûjbûna dûzanekî ye. Girtî û hişbûyî. Lewra îro roja wê ye. An li bilindahiya çiyayekî an li bêserûberiya deştekê biqîre, ne ji bo da ku zilm guhên xwe miç bike(bigre) û tevzînokên şermê li ser pozê wê bijenin, nexêr ne ji bo ku poşmanî bixuye li ser rûçikên zilmê û neviyên Asena bîhna dilpakiyê bikin. Lê belkî ji bo ku carek be jî tu tama dengê xwe yê xesandî û kewandî bibihîzî...

Binêre, li Ewrupaya ku li mazatê qet dilopek ken jî peyda nabe û jiyan weke bûkeke xeydok her tim li mala bavan e, hemwelatiyên te mîna “darika zavê” xemilandî ne.

Mirovahî bûye mij û xunav difûre ber bi asîmanê vê parzemîna qedîm ve. Bîhnpakiya zerdeştiyan dibare bi ser gunehên rojhilatnas, xwedî şirket û bazirganên Ewrûpî de.

Serê hemwelatiyê te bilind e. Ew doza roja xwe dikin. Di dîrokê de cara yekemîn ku bi hezaran dilên me yên ku bi sewta neyaran hatine kerrkirin di yek qezanê de dikele û bi heman agirî...Pozê wan hemûyan bi hestê evîna rûmetê disoje. Kî çi bibêje bila bêje, roja ku tonek edalet ji kîloyek petrol girantir û bihatir bibe dê bi hewl û keda destên we yên mezlûm pêk were.

Ji her car û her heyaman nêzîktirî we ye, îkbal û talîhê we yên ku koremaran ew li pişta heft çiyayan veşartibû. Va ye, li ber çoka we ye. Ku hûn destên xwe dirêj bikin, azadiyeke hevrîşimî dê di nav mista we de bihele. Bimeşin û bila stêrk ji nav porê we biweşin. Bila stêrk biweşin û li dewsa piyên hovîtiya ku şarezahiya welatê me yê delalî di zikê xwe yê mezin de cûtiya bi tenê berfîn bibişkuvin.Bila zimanê xaka me yê ku ji tîbûnê qelişiye, berfînan bialîse da ku derman bibe.

Min bi çavên xwe dît, ji wî dilê te yê pelixî îro tîr diweşin. Êdî a niha evîn û têkoşîn sirûdeke serbestiyê ye, li ser lêvê te yê nazenîn. Lewre ez pir şanaz im, dev li ken û bextiyar im. De fermo em bi hev re bimeşin, bila şehîdên me ji çeperên xwe rabin û tevî senfoniya zîzbûniyê bibin...

çapkirin