anmeldung

Stêrkek ji esmanê xebata azadiya jinên cîhanê winda bû

Hêvî berwarî
Seroka Komîta Jinan ya Navenda PENa Kurd
7-11-2004

Beriya du salan ez û hêviyên xwe û hinde hestên birîndar ber bi wexereke tevayî ve bi rê ketin; bi min re bû giriyê zaroyên ji memikên diya xwe veqetiyayî û hinde mînakên zîndî ji bedenên jinên bi saxî binaxkirî; dîsan peyama melayketên esmanê Helebçeya şehîd. Geşta min bû welatê Makedoniya, dîmenên xwezayê û pêlên deriya ku weke xanima Feto azad, ew welatê ku ez û xanima hêja li wir himbêzkirin, li her aliyê me kevokan distira.

Fetoya reşik banga hestên sipî dikir û dixwast quncên tarî bi fanûsa hestên xwe ronî bike û her kes ji nifşê wê şerbeta azadiyê binoşe. Lewre, silava mina dûr pir nizîk girt û dilê xweyê bi qasî derya ji bo birînên doza me vekir û hûrik hûrik guhdariya stranên minên birîndar kir; dîsa wêneyên welatê meyê şewitî li ba xwe girtin.

Herroj sibeyan xanima Feto bi reng û cureyekî bi kincên xwe yên gelerî xwe dixemiland û bi rûyekê vekirî û girnijîn ve em silav dikirin. Xanima Feto rewşa civînên me bû; wê dixwast bibe serkêşa karwanê azadiyê ji bo hemû jinên cîhanê, bi taybet civaka wê, ya ku pir pêwîstî bi pêşengeka weha heye. Wê dixwast bi destên xwe hemû girêkên civakî veke, bi helbestên xwe jinan şiyar bike û tevî xebata azadiyê bibe.

Min xanima Feto hefteyekê dît, lê ji min we ye, ew demeka dirêj bû ez wê nas dikim; ji ber ku wê zû bi dilekî mezin em qebûl kirin. Em bi hev re di civînên Komîta Jinan de beşdar dibûn, bi hev re me helbest dixwandin, bi hev re wêne digirtin, bi hev re digeriyan. Birastî min dixwast îsal jî tevlî karê xwe bibim, da ku hevalên xwe yên mîna xanima Feto himbêz bikim lê mixabin ...

Bi windabûna xanima Feto stêrkek ji esmanê wekheviyê winda bû, mûmek ji malbata her jinekê vemirya. Lê xanima Feto di dilê her kesekî xwedî wijdan de, yê ku banga wekheviyê dike zîndî ye, wê rûpelekî sipî di dîroka mirovatiyê de hêştiye.

Bi xem û keder em silavên tevaya jinên Kurd, tevaya zaroyên Kurd, silavên her malbateke Kurd ji bo giyanê pakê xanima ku çi car namire, xanima feto pêşkêş dikin.

Silav ji bo malbata xanima Feto
Silav ji bo tevaya jinên cîhanê

çapkirin