Koçberê

Hoşeng Osê

Tenahî, eşq û bêrîkirin, min digvêşin…

û çavên te yên melûl ji derya re dikene.

Dikim bi çolan kevim.

Çol dikin bi min kevin.

Şûna zixtên kêran di dengê min de nemaaa.

Cihê girî di geweriya min de nemaaa.

War ji xemên min re nemaaan.

Gor ji xewnên min re nemaaan.

Aso ji sawêrên min re nemaaa.

Vedengên persar û beyebaniyan ji qorîn û zarînên birînên min re nemaaan

… û enaaam neman koçerê…

Bîhoka sor û zerê

Mêkewa li ser bênderê…

Bêndera janên berê…

Binere li vê derê.

Parsekim û çavên min li destên te û kenê çavên te ye.

Dimirim û guhên min li hêviya degê te ye.

Her tu li derya biner î

Nasbike li te dinerim.

Esman im, de dilê xwe ji min re ve, û bigrî.

Bi serê halê min de bigrî.

Bi ser xweliya min de bigrî.

Bi ser giriyê min de bigrî… ta hîv birjê û ji birca xwe derê

… û emaaan neman koçerê

***

Berî 11’e salan ez hatim kuştin.

Piştî 11’e salan, ez 11 sal hatim kuştin.

Destên min toza çiyê bû û dilê min çemeke xwînî.

Çavên min du findên qes bû û gewriya min hewara Xwedê.

Pişta min bajerkî mirî û sînga min hêlîna teyrê beratan bû.

… berî 11’e salan tu pêrgî min hatî, ez zembîlfiroşekî dînoke bûn.

Piştî 11’e salan ez pêrgî te hatim…

Tu cîhanek ji xem û jan û şikestinan bû.

Û “hebû tinebû…

Hebû ez û tu”

… de aaax û yeman koçerê.

***

Hingî min ji te hezkir, biqasî heft welatan min te birîndarkir.

Hingî tu ji min reviyî, biqasî heft dojehan, te min xwe û derya birîndarkir.

Her ku li derya biner î, li te dinerim.

Her ku derya li te dinere, li xwe dinerim.

Çiqas dirvê te bi esman dikeve!.

Çiqas dirvê birîn û şikestinên te bi yê min dikvin!.

Dereng e…

Havîna min li ber dergehên te qerimî…

De careke din dilê xwe ji sira bayê serê sibê re veke.

Dikim biçilmisim, de bi kenê çavên xwe dîsa min avde.

Dikim bi,arim…

Ji min re bibe cîhanek pemba û şînar, da bibim tavanek wetayan û bi ser te ve bibarim.

Serê xwe deyne ser sînga min û bigrî, û destê xwe ji bindan berde. 

Evîna min ji gumanên xwe re nehêle.

Bihêle serê xwe deynim ser sînga te û têra çiyayê Cûdî bigrîm.

Evîndar gunehin û gunehkarin…

Xwedê di gunehên wan de dibûre.

De ka veneke defterên berê…

Emaaan neman koçerê.

***

Ne ez ji te têr dibim ne derya.

Bes e, em ji xwe direvin.

Qedera te ye, ez pêrgî te bêm.

Qedera min e ez dînê te bim û li pey te bikevim.

Ne sûcê te ye, ne yê esmên e.

Sûcê minrinê ye…

… û aaax û yeman koçberê.

İstanbol

21/4/2010

çapkirin