Li Kosovo dîlan û li Kurdistan pilan

 Hozan X. Efrînî, efrinzan@gmail.com

Piştî ku Yekîtîya Sovyeta berê ku hate roxandin gelek welatên cur be cur hatin avakirin û bûn bi xwedîyê nasname û pênasên neteweyî yên xwe li her deverên cîhan, herwa bi piranî jî ji hêla Amerîka û UN ve hatine pîrozkirin, lê mixabin li welatê rojê jî(Kurdistan), her kuştin û qirkirina kurdan hatiye pîrozkirin û erêkirin.

Îro li Kosovo dîlan e û li Kurdistan jî pilan e, ma ev çi jiyan e……ev çi demokratî û dadwerî ye…ma gelo parastina mafên mirovan  va ye…darijtina têgehên wekhevî û demokrasîyê di cîhanê da ev e….ma rêzgirtin li vîna gelan ev e….

Di van çend rojên pêşîn da li welatê Sirbistanê, welatekî nû hate avakirin û yekser ji aliyê Amerîka û UN de hate pejirandin û pîrozkirin.

Lê îro li Kurdistan tev kuştin û qirkirina kurdan ji hêla Amerîka, Îsraîl û welatên Ewropa ve têne piştgirîkirin û bêdengî li hemberî kiryarên Tirkiye, Îran û Sûriyê berdewam dikin, ku roj bi roj li bakur û başûr, li rojhilat û rojava lêdan û têkdan e, tev şînî û berxwedan e, roj nîne dayîkên kurdan bi dîlan û lîlan bin, lê her dem bi girîn û dilgiran in. Bi rastî ev rewş êdî pesend nabe, wîjdan jî pesend nake, ku ev rewşa mirovan be…

Di demeke kin da li rojavayê Kurdistanê, li bajarên wek Qamîşlo, Efrîn û Kobaniyê bi sedan welatparêz û xebatkarên kurd bê tewan, ji hêla peyên rejîma Baas ve hatin girtin û bê ser û şûn bûn; herweha bi lêdan û îşkence dan, ta ku toşî newaşî û nelibarîya tendirûstîyê bûn, herwek bûyera şehîdbûna mamoste û siyasetmedarê mezin î Kurd, perlementer Osman Silêman Kobanî, ku bi tewanê livandina hestên neteweyî yên gelê kurd li hemberî rejîma baasî da dike, jiberku wek rêberekî gel di xweda dît, ku serkêşîya xwepêşandana gel li bajarê berxwedan û kurdiyetiyê(Kobaniyê) bike û pêkanî, lê bi rastî bi serbilindî jî erk, kar û xebata xwe ya neteweyî bi cih kir û bi serfirazî jî tevlî karwanê pakrewanên rêya rizgarî û azadiya gelê Kurdistan bû; eva jî vîna gelê me lawaz nake, belkû bi hêztir jî dike û dengê rastiya doza rewa a neteweya Kurd bilindtir kir… lê mixabin her bêdengîya hêzên navnetewî ye…. herwa li bakurê welat jî ciwanekî 16 salî xistin bin dolabên panzer û zirupêşan û ew wek mîrolan pelixandin… her bê dengî ye….herwa li rojhilat jî ciwan û xwendevanên kurd, bi êşkencedan û lêdan tên kuştin û xelkê sîvîl jî yên ku li nêzîk sinoran dixebitin ji bona pariyek nan jî bi destên pasdarên Ecem têne gulebarankirin …dîsa jî her bê dengî ye. Li başûrê Kurdistanê ku herêmeke azad û fedral e û li jêr kontrola Amrîka da ye roj bi roj ji hêla balefir û firokên cengê yên tirkan ve têne bomebarankirin û her bê dengî ye…ma gelo ta çi demê her bêdengiya hêzên navnetewî wê bidome?…. Ta çi demê wê piştgiriya dagîrkerên Kurdistanê bikin?…Ta çi demê siyasetmedar û rewşenbîrên me wê hêla sor derbas bikin?….Ta çi demê partî û rêxistinên me wê bê lobî bin û her berdest bin,  bê deng û bê reng bin?….Li Ewropa jî hewlî daxistina Roj-Tv  dikin, ku sembol û pênasa tevahî raghandin û medyayên kurdî ye. Ma kes dikare nikolî li vê rastiyê bike, ku di demekê da  televiziyona-MED-TV dest bi weşana xwe kir, tu kesî Kurd bawer nedikir, ku tiştekî weha bibe û ta roja îro jî wek  nûneretiya medyayên Kurdistanî tê dîtin; wek çawa Partîya Demokrata Kkurdistana Îranê bi partîya serekî û dayîk tê naskirin, jiberku partîya yekê bûye li Kurdistan, herweha Roj-Tv jî wisa ye. Ma gelo ev çi sîstem û bêmafî ye, ku bi derheqê gelê me da dibe û her bê dengî ye…

Dema ku ez vê nivîsa xwe dinivîsînim, rexne û helwest digirim, ez xwe jî di nav da dibînim, wek rewşenbîrekî Kurd….Eger em li rastîya siyaseta navneteweyî binêrin û baş binirxînin, gelek tiştên nû û sere û mer derdikevin holê, wek çawa gelê Kosovo serbixwebûna xwe radigihêne, Amerîka û hêzên navneteweyî pîroz dikin û rêz ji bo vîna gelê Kosovo digirin; em jî Amerîka li ser wê helwêstê piştgirî dikin, lê dibe wek çawa rêz li vîna gelê Kosovo digirin, bila nîvê wê jî ji vîna gelê kurd ra bigirin, emê spasdarê wan bin heta hetayî. Lê mixabin ta roja îro jî, ji ber hindik berjewendî, ne Amerîka û ne jî Ewropa rêz li vîna gelê kurd negirtine; ji bilî mijara mafên mirovan û demokrasiyê tiştek nebûye. Ta niha jî gelek rewşenbîr û siyasetmedarên amerîkî û rojavayî di xwe da nabînin ji herêma Kurdistanê ra bibêjin "Kurdistan", belku bi bakurê Îraq bi nav dikin. Ev jî bêrêzîyeke mezin e li hemberî vîna azad a gelê kurd û Kurdistan. Lê emê her bibêjin li Kosovo dîlan û şahî ye û li Kurdistan jî her pilan û têkdan û şînî ye…û bê dengiya welatên navcîhanî ye….

Li gel rêz da

Hozan X. Efrînî

çapkirin