Sosretên nû

 Înayat Diko

Bav û bavpîrên me digotin: Rîh dibe bost û dijmin nabe dost.

û digotin, ne dîtina Ereban û ne jî vexwardina şîrê hêştiran.

lê ji bîra me neçe dîsa dihat gotin: çûkanî û mezinahiya maran tune ye.

Ger insan li van salên dwaî binêre û bi çavekî gerrok û pîvane ronahiyê bide ser bûyeran, wê li dawiyê rastî gelek tiştên veşartî û bincilî were.

rojên dîroka nûjen bi lez û bez weke zencîra ( Tom & Jerry ) derbaz dibin û xwe di ser hev re davêjin û têwer dikin.

Iraq rizgar bû, Seddam Hussên çû û kembera aramiyê dilê azadîxwaza pêçand.

Başûr rizgar bû û Kurdan li cîhan û perçeyên din ji Kurdistaniyan hevîr û nanên xwe li ber tîna agirê tenûra başûr li darxistin û hên jî li dare.

lê kula bi dehan salan ku xwîn jê diherike ( Kerkûk ) derman nebûye,

Erebên Iraqê  û kesên din ji me re name û soz dişandin û digotin: Ji mafê we ye ku win dewletê jî bixwazin û Kurdistanê xwexwaz  îlan bikin, û Kongera London û Selahudîn li ser vê yekê şahidin.

û me jî dergeh, ax û esmanên xwe ji wan Ereban û dostên Ereban re vekirin û  di ser xalîkên sor re, me ew bi merasîmên giran meşandin.

ji bala me çû bû ku li Emerîka giropa ( THE NEW AMERICANS ) bi derketiye û serkêşiya berjewendiyên xwe yên demdirêj dikin.

haya me tune ye ku li Almanya ( NEW NAZIS ) hene û roj ji rojê rola wan bilind û xurt dibe.

em nizanin ku li Tirkiyê ( NEW ISLAMISTS ) hikumdariyê dikin û dewletê bi rê ve dibin.

Me qet nizanî bû ku di roja îro de jî li Iraqê jî ( NEW SADDAMS ) bi derketine.

dem dema ecêb û sosretane, ne dostantiya herdem û ne jî dijmantiya hemdem.

ka çawa emê vê yekê nas bikin ?

ka çima li weltê me jî girop û komikên ( NEW KURDS ) nayên der û sînorên partîtiyê nayên naçirînin ?

û şikeft û lalişên Kurdewariyê ji xwe re bikin keştiya stratîjik.

çima em ibretan ji Parlemetarên Israelê nagrin , gava Angela Nerkel li pêş wan di Kinîsêtê de bi almanî axivî , yekser rabûn ser piya û li dijî wê gotin : ku zimanê Almanî bihna HOLOKOST ê jê tê.

gerek mirov bêje û biaxive û banagên xwe bike, rojane biqîre , dem dema hebûn û nebûna Kurdane, Ereb, Tirk û Farisan ji me re nabin bira û dost.

ecayîbe ev dem !

ji aliyekî de Emerîka dostantiya Kurdan dike û ji aliyê din ve jî gurê har ji bakur ve derbazî başûr dike û dihêle çekên Kimyawî werin bi kar anîn.

serdana Iranê tê kirin û hên nanê mîvantiyê li ber devê me sar nebûye , Qendîl bi giranî tê gule baran kirin.

ev çi bazar û zerare ?

me xwe mijûl dikir û me gotin, ku destdirêjiya li ser Kerkûkê, wê bersivên giran ji Amed û Qamişlo bibîne.

ma ne hên Kerkûk di nexwaşiya giran de ye û Amed jî di dîlana AKP de sergovendiye.

bi devekî vekirî divê em bêjin ku ev çerx û dem dema sosret ecayîbane.

ji sosretên tên bîra min ezê hinekan ji wer e raghînim.

Sosreta 1

Li bakur ji ( 25 ) Milionan , Kurdan ( 20 ) Parlamenter tenê bi serxistin, ka mirov ji xwe bipirse: Gelo ma hêvanê bîst salan, bîst Parlameterin ?

lê hên mofirka sosretê li bakur eve ku ( AKP ) li Kurdistanê dengên herî bilind bi destxistin.

welleh ev zor girane ?

Sosreta 2

Tirk derbaz bûn û îzara keçantiya Kurdewariyê şikest , lê tevî wê yekê, me serdana Tirkiyê kir û şev û şevînên xwe jî li wir me baş qedandin.

li hemberê Ereban jî diranên xwe tûj kirin û rabûn ser du lingên xwe yên paşîn û Referendom ji destên Kurdan kişandin.

Sosreta 3

Kurdên rojavaya Kurdistanê, bazdan û livên xwe kirin û çûn ba şêx û mellan û li dawiyê bi fermana nepîrozkirina Newrozê bi derketin.

mixabin !

lê gava xwîna şehîdan rijiya , rûreşiya wan li rûyê wan vegerî û gotin: Ka bi kêmasî em meşekê li Brûxelê li darxînin ta em rûyên xwe li pêş xelkê xwe sipî bikin.

mirov ji xwe bipirse ?

gelo ev qet şerm nakin ji ( 13 ) partiyan / 138 / mirov tenê hatibûn meşê û pirên wan jî ne girêdayî rêxistin û saziyan bûn ?

hatibûn ji bo sûretên xwe bigrin û ji avahiyên penaberiyê re bi rêbikin.

hên ji wê girantir, gelek malperên kurdî wek dema Seddam  û Sehaf hejmara xwepêşandaniyan bilind û berz kirin.

Sosreta 4

wek her kurdekî di rojên berî û Newrozê de , min bal û guhên xwe dan hemû Televizyonên me.

Roj TV – giranî û lêkolîn û wergerandina rojên Newrozan dabû wan Partiyên ku di bin sîwana KCK de dilivin û dixebitin.

KURDISTAN TV – berê insana dabû çiya û xwarina DOLMEYAN û reqs û govendan.

KURD SAT – hema hema  mirov wê gotiba: De pariyek nan ji birçîbûnê baştire, ji bilî kolan û cihwargehên ( YNK ) tiştekî din nedihat ber çavên mirovan.

Belê KURD SAT – mala we ne şewite !

tê naskirin ku Sulêmaniyê keleha rewşenbîriyê û pêşketina civak û komelatiya Kurdî ye.

yanê mirov difikirî ku bi dirêjahiya rojên Newrozê gerek li başûrî Kurdistanê û bi taybet jî li Sulêymaniyê , Semînar , şevîn , rojanên rewşenbîrane , xwepêşandanên giran û meşên ji agir bi ber ve Kerkûkê ve çûbana, lê ji bilî dîmenên ziwa û stranên hişk tiştek nehat weşandin .

NEWROZ TV – xwedê mala wan berz bike , dema ku raporekê dixwînin, sed sala berê tê bîra mirovan.

û hên ji wê zortir ku gava li ser ekranê bi Kurmancî dinêvisînin, riya rast li pêş insanê Kurd şaş û winda dibe.

ROJHILAT, KOMELE, ZAGROS, TISHK û hîn gelekên din jî bi rê de ne, xwedê mala wan ava bike, ( şîrê kerê ne besî kurriyê ).

Sosreta 5

ewe ku em mastê sipî, reş dibînin û komira reş, wek berfa çiyan dibînin !

ewe ku ji ( 40 ) Milion Kurd bi kêmasî ( 35 ) milion van rastiyan bi giştî  dizanin û tê dighîşin lê em na axifin !

gelo çima nabêjin ?

çima em nabêjin, çiam win nabêjin ?

çima van rastiyan nabêjin ?

çima li ser xewdikin ?

çima çavên xwe dadimrînin ?

çima pila partîtiyê didin pêş ya Kurdewariyê ?

çima bawermendiya Kurdan şûna netewa Kurdan cih digire ?

çima rewşenbîrên me bûne pepûk û Sehaf û bûne rewşempîr ?

çima malperên me bûne meydana hêf vedanê û tolhildanê ?

çima li Almanya, zimanê Tirkî, Erebî û Frisî bûye zimanê zikmakî ji malbatên Kurd re ?

çima em rexnegiriyê wek sûc û gunehkariyê dijmêrin û dibînin ?

çima kulîlkên me yek rengin ?

çima partîyên me nirînên xwe tengin ?

çima û çima û çima ?

bersiv li ba we ye !

bersiva van sosretan, win hemû baş dizanin.

lê gelek tiştên din hene em newîrin bêjin.

li dawiyê

sosretbaş ji we re.

û di nav sosretan de bimixmixin

bimînin di nav sosret, xêr û xweşiyê de.

sosretin din li benda me ne.

                                                 ° ° ° ° ° °

 dikoo@hotmail.com

çapkirin