Dîmenê Yekê: Bajarê Wanê

Newroz e. Jin û keçên ciwan, daykên pîr bi kincên rengîn daketine nava koçe û kulanên bajarê Wanê ku cejina xwe ya millî Newrozê di roja yekemîn ya biharê da pîroz bikin. Gel ji zarokê 7 salî heya kalên 70 salî di qada bajar da kom bûne. Di demsala nû da hem evîneke nû di reng û rûyê wan da heye û hem jî bi dengekî tejî hêz daxwazên xwe yên hezar salan dubare dikin. Dengê wan digehe esmanan û di demeke wiha de ji nişka da polîs û hêzên taybet hêrişî wan dikin. Tank û panzer, çekên germ û sivik li dijî Kurda dadikevin nava kuçe û kulanên bajar. Ew çav tarîne û tiştekî nabînin, ter û hişkan bi hevre dişewtînin. Ji wan re ferqa di navbera mirov û ajelan da tune, çimkî bi kîneke tejî hêrs lêdana jin û keçan, zarok û mezinan didomînin. Bi van kiryarên hovane Özel tîm û Tirkên faşîst careke din rûyê Naziyên serdema Hitler spî dikin û wan tînin bîra dîroka mirovahiyê. Ziman pîsiya polîsên Tirk weke ya serxweşên bêşexsiyet e ku carna li ser jin, keç û namûsa xwe bi hevre qomarê dikin. Ew piştî birîndarkirna sedan kesan, ciwanekî Kurd yê binavê Zekî jî şehîd dikin

Dîmenê Duyê: Bajarê Geverê

Li Geverê bi deh hezaran Kurd bi alên rengîn serhildana Kaweyê Hesinkar bi bîra me tînin. Qêrînên wan daxwazên Kurd yên dîrokeke dûr û dirêjin. Herêma wan di dîroka siyasî-civakiya Kurdistanê da xwedî hinek taybetmeniyên cûdaye. Hem serhildana Oremar(1930 zayînî) li wira çêbûye û hem jî dewlemendiya çand û zimanê Kurdî li wira xwedî bihayekî dêrîn û mezine. Colemêrg weke keleha taybetmendiyên Kurda yên netewî tê ber çav ku hê jî ji aliyê dagîrkeran ve nehatiye dagîrkirin.

Wê rojê Êqbal bi evîneke mezin xatir ji dayika xwe Eyşanê xwest û jêre wiha got:“ Dayê ezê îro hem Newroza hemû dayikên Kurd û hem jî Newroza xweşka xwe ya şehîd Sidîqayê pîroz bikim…“!. Wî wiha got û bi hezar hîvîyan xwe gehand nava koma ciwanên Kurd.

Ji ber hêrişên artêşa Tirk bo ser hêzên gerîla demek bû ku hêrsa Kurda ya li dijî AKPê û hikumeta Tayp Erdogan pir zêde bibû. Ji bona wê jî îsal kîna Kurda ya li dijî dewletê pir bilind bû. Hêzeke mezin di çavên keç û xurtan da diyar bû. Wan wê rojê dixwestin ji dijimin re bidin îspatkirin ku PKK ne tenê li çiyayên Kurdistanê belkî bîr û ramanên wan çiqas li çiyan bihêz bin, li bajar, gund û deşêtên Kurdistanê jî gelek bihêztirin. Vê rastiyê wê rojê li Gever hemû dost şakirin. Kurda hertim di roja Newrozê da daxwazên xwe yên netewî bi lêv kirine. Lê dîsa jî rayedarên Tirk tehemûl nekirin ku rastiyan bibînin. Bersiva wan dîsa weke her carê şerê li dijî keç û ciwanên Kurd bû. Êqbal bi hêrseke mezin kevir davêtin panzer û özel tîmên Tirka. Hêrsa wî ya li dijî dagîrkeriya Tirkên faşîst zû ket çavê kamerayên MÎTê û ji dûrve kiryareke weke sûqest li dijî wî pêkanîn. Qelbê wî yê mezin kirin armanca goleyên xwe û ji dûrve li wî xistin. Ew jî bû şehîdê doza Kurdistanê. Êqbal Yaşar jî weke xwîşka xwe tevlî kerwanê şehîdên doza Kurdistanê bû.