Herbijî Gerîlayên Qehreman…

Kakşar Oremar, Email: kakshar_oremar@yahoo.de

Li çiyayên Kurdistanê şer berdewame. Gerîlayên qehreman Helicopterek Kubra xistin xwarê. Di şer da serbazên artêşa Tirkiyê nikarin li hemberî gerîlayên Kurd li berxwe biden. Rayedarên komara Tirkiyê bi hevkariya hemû zilhêzên cîhanê li dijî hebûna Kurda rabûne ser xwe, hemû teknolojiya xwe xistine xizmeta wan, lê ser nakevin. Çimkî ew ji hêza veşartiya volkanên Kurdistanê bêxeberin. Nizanin ku Iskenderê Mekdonî(Aleksander makedonya) û Gezenfon Yewnanî jî bi rûreşî ew deşt û çiya terkandibûn û bi reva xwe re negehiştbûn!.

Di sir û seqema çilê zivistanê da evîna Kurda li her derê germ e: Li deşt û çiyan gerîla û şoreşger, li bajar û gundan dayik û siyasetmedar û li her dera Ewropa mêtîng û meşên biçûk û mezinan bêrawestan berdewamin. Di peyvekê da: Êdî Kurd nizanin rawestan çiye. Neyar mîna bav û kalên xwe wisa dizanin ku Kurd hemen Kurdên berê ne û di zivistanê da riha wan jî mîna riha erdê dicemide!. Dibêjin:“ Heya ku zivistane, gere em ava jiyana wan biçikînin…“. Gelo ma rast texmîn dikin!?? Ne … ne, ew razayîne. Ji ber ku yên bi xewin û xeyala bijîn, serê wan zû bi kevra dikeve. Zû ji xewa xefletê şiyar nabin. 30 sale hê jî mêtîngerên Tirk ji xewa giran şiyar nebûne, çimkî çavên xwe ji ronahiya rojê ra girtine. Kurda nabînin. Ji qeder û dîroka gel û dewletên din jî îbretê nastînin. Hê jî li ser dirûşimên xwe yên Kemalîstî bi îsrarin. Ma çi bi serê Hitler hat? Ka kî behsa bîr û ramanên faşîstan dike? Înkargerî kengî û li kûdera cîhanê xwedî rûmeteke xweş û domdirêj bûye? Elbete rojek jî yê were ku Kemalîst yê şermê ji xwe û kiryarên xwe yên li dijî gelê Kurd biken. Yê neviyên wan bi çavê şermê li axa Kurdistanê temaşe biken û yê ji xwe bipirsin:“ Gelo çima kalkên me yên Kemalîst wiha bi serê Kurda anîn, lê dawiyê jî ew bûn xwediyê Kurdistaneke serbixwe!?...“

Di rewşekê da ku Tirk û dagîrkerên Kurdistanê yên din bi hemû şêweyan mafên Kurda binpê dikin û wan bi cudayîxwaziyê tawanbar dikin, du milyon Kosovoyîyan serxwebûna xwe ragehandin. Êdî Kosova ku tenê îyaleteke Serbestanê bû, welatekî serbixweye. Croatia, Bosnia û Herzegovina, Montenegro û Albania berî çend salan tenê bi navê „komara Yugoslav“ dihatin naskirin, lê ji salên 1990an û pêde wan bi daxwaza xwe serxwebûna xwe jî îlan kirin. Di serî da Amerîka, gelek dewletên Ewropayî û heta Efxanistanê jî serxwebûna Kosovo bi awayekî fêrmî nas kirin û Rusiya û Serbestan jî çi dikin, bila hema xwe bihelavêjin.

Êca ne durûtî belkî dixwazim bêjim hezar rûtiya Amerîka û welatên Ewropa (ku demokrasî kirine benîştê devê xwe yê rojane), vê carê baştir eşkere bû. Ew ji bo berjewendiyên xwe her roj bi awayekî bi qedera 45 milyon mirovên Kurd dilîzin, lê rê didin 2 milyon Kosovayîyan ku ala serxwebûna xwe hildin. Li xerîta Kurdistan û Kosovo binêrin, ku baştir ji min têbigehin ka armanc ji vê nivîsê çiye. Ez wek mirovekî Kurd ne li dijî hesret û xweziyên gelên bindestim. Çimkî bexteweriya netewan di azadî û serxwebûna wan da ye û ev roja pîroz li hemû xwîşik û birayên welatê Kosovo mimbarek be. Lê ka binêrin mirov ji bo pere û petrolê çawa bi qedera gelê Kurd dilîzin!. Zêdetir ji dused sale ku Kurd ji bo serxwebûna xwe şer diken lê negehiştine armanca xwe, gelo çima yên ku kêmtir ji bîst salane xebatê dikin, wiha zû gehiştin daxwazên xwe? Aya ji ber erdnigariya me ye, anku ew nêzî Ewropa û em jî li Rojhelata Navîn dijîn? Welatê me dewlemend û ew feqîrin an jî çi?!!

Di van çend rojên derbasbûyî da TVyên Ewropa û Amerîka bi berdewamî behsa Kosovo û dîroka wan dikin, li ser tevkujiyên ku bi serê gelên Balkan hatine, filmên sînemayî belav dikin, lê kes behsa bombarana gund û çiyayên Kurdistanê nake!! Kes li ser dagîrkeriya Tirkên dagîrker tiştekî nabêje. Kerr û lalin, mit û bêdengin!!.

Birastî wijdana mirovahiyê heya kengî yê di xewa berjewendîperestiyê da bêdeng bimîne?!!

Ji kevina da gotine:“ Ji xeynî nênîka min, kes naxwrîne pişta min“. Gerîlayên me, taca serê me û parêzvanên şerefa Kurdîniyê di mercên herî dijwar da bersiveke baş dan artêşa Tirkiyê. Bila ew bi tenê nemînin. Ji ber wê jî bi dengekî bilind ji we dawa dikem:

Kurdino, Kurdên xwedî dîrokek dêrîn û tejî serbilindî, hemû çînên civaka Kurdistanê: werin em tev hêza xwe bikin yek daku: Zilhêzên cîhanê me baştir bibînin, qîmeta me di nava me de zêdetir bibe, neyar hisabeke mezintir ji mere bikin û di encamê de em jî weke hemû netewên cîhanê bibin xwedî al û welatê xwe yê serbixwe. Werin em bibin yek daku vê rûreşiya dîrokî ji nava çavên xwe paqij bikin. Ji bîr neke ku: Mezintirîn netewa bêdewlet li rû erdê Kurdin.

çapkirin