Hunermend Şehram Nazirî: Sembola „Lêgion d`Honneur“a Firansayê Stand...

 Kakşar OREMAR

Roja 29.08.07an li welatê Firansa nîşana kulturî ya herî bilind(Lêgion d`Honneur) dan hunermendê Kurd Şehram Nazirî. Ew di Kurdistana mezin de yekemîn kese ku xelateke wiha distîne. Beriya Şehran Nazirî hunermendê mezin Şivan Perwer jî li Firansa xelata „World Muzik“ standibû.

Hejî gotinêye ku: Di Îran paşnavê Pavarotti dane Şehram Nazirî û li Kurdistanê jî ji Şivan Perwer dibêjin:“ Pavarottiyê Kurda“.

Merasima dayîna xelatê li salona şanoya bajarê Parîsê(Theatre de la Ville) hat li darxistin û di nava hezaran kesan de ew xelat dan hunermend Şehram Nazirî. Sedema dayîna vê xelatê ew bû ku bandora huner û dengê Ş. Nazirî di nasandina helbest û felsefeya Mewlana Celaleddînê Romî de mezin hatiye nirxandin. Zêdetir ji 30 salaye ku Nazirî li ser muzîk û awazên muzîka Îranî ya kilasîk dixebite ku di hunera Îranê de bi navê:“ Muzîka Sûnnetî“ tê naskirin. Ji çend sal berî niha û pêve Nazirî dest bi xwîndina stranên Kurdî jî kiriye ku destana „Şahnama Kurdî“ bi dengê wî di nava gel de bi başî hatiye pêşwazî kirin.

Mîdal an jî xelata „Lêgion d`Honneur“ nîşaneke fêrmîya dewleta Firansêye ku zû bi zû ji herkesî re nayê dayîn. Kesên ku wê mîdalê distînin li hemû welatê Firansayê xwedî hurmeteke mezinin. Mesela ger li kulanên bajarê Parîsê kesekî artêşa Firansayê wê mîdalê li ser singê kesekî bibîne, silava leşkerî û hurmetê dide wî. Wergirtina vê xelatê pir zehmete û piştî lêkolîneke berfireh vê xelatê didin hunermendan. Şehram Nazirî çend sale ku bi rêya organîzasiyona şanoya bajarê Parîsê li welatên mîna: Japon, Amirîka, Birazîl, Afrîka, Merakêş, Libnan, Ingilstan, Alman û …konsertan pêşkêş dike. Nîşan an jî mîdala navbirî sê derce hene ku maosta Ş.Nazirî binlindtirîn derca(Lêgion d`Honneur) standiye. Li gor desteya jorî xelat ji wan hunermendan re tê dayîn yên ku di cîhana hunerê de pêngavên nû hilanîne û di rêya bilindkirina çanda civakê de liv û lebateke nû çêkiribin. Nazirî heya niha bi wan konsertên ku pêşkêş kirine karîye heya radeyekê di nasandina kultur û çanda Rojhelata Navîn bi gelên Rojavayê xwedî rolekî berçav be. Şehram Nazirî ji malbateke naskirî ya Kurdên bajarê Kirmaşanê li rojhelatê Kurdistanê ye ku kar û xebata muzîk û hunerê çend nifşe ji bapîr û bavê wî bigire heya kurê wî(Hafêz Nazirî) di jiyana wan de karekî sereke bûye.

Cihê keyfxweşiyê ye ku herçend di van salên dawiyê de Kurdên rojhelatê Kurdistanê di qada siyasî de zêde aktîv nebûne, lê di qadên çandî, wêjeyî û hunerî de li hemû Îran û cîhanê xwedî çalakiyên berfireh û mezinin. Nivîskar, werger, hunermendên herî baş li Îranê ji nava Kurda derketine ku navê Kurd û Kurdistanê jî bi keda xwe li her derê bi rindî dane nasandin. Behmen Qûbadî, Hadî Ziyaeddînî, Îbrahîm Yunisî, Koma Kamkara û çendîn kesên din li Îran û cîhanê navên naskirîne.

Di dawiya merasima tejî germî û bi coş de mamosta Şehram Nazirî bi hevkariya çend hevalên xwe yên hunermend konsertek pêşkêşkirin.

Mamosta Şehram Nazirî: Bila ev xelata dîrokî li te pîroz be û hîvîdarim ji vir û pêde bi dengê xwe yê xweş bibî dengekî herî bilindê netewa xwe ya bindest jî.

çapkirin