Nameyek ji Mamosta Şivan Perwer ra

Kakşar Oremar, Email: kakshar_oremar@yahoo.de

Berî çend roja serokwezîrê Tirkiyê Tayyîp Erdogan di hevpeyvîneke xwe da behsa vegera hunermendê Kurd Şivan Perwer kir!!. Tirka berî wê TRT6 jî vekirin û wî di mesaja xwe da wiha gotibû:“ TRT6 bi xêr be.“. Elbete dema kesekî weke Erdogan bangeke wiha li Şivan Perwer dike, ev nîşana mezinhaiya Şivan e û baştir ji me ra dide kifşê ka bandora wî di nava dost-dijiminan da çiqas zêde bûye. Çimkî Erdogan serokwezîrê welatekî ye ku piraniya axa Kurdistanê di bin destê wan da ye û li Rojhilata Navîn jî xwedî cihekî istratejîk e. Lê li rex van gotin û kirinên wiha wek hûn jî dizanin di roja îro da piraniya endamên parlemana Tirkiyê ji partiya AKP`ê ne û T. Erdogan jî serokê hikûmetê ye, lê di parlemanê da Kurd hê jî nikarin bi zimanê xwe yê zikmakî biaxivin û serokê parlemanê jî zimanê Kurdî wek„ zimanekî xerîb û nenas“ bi nav dike. General û mîratgirên pergal(sîstem)a Kemalîzimê weke marê kore xwe bêdeng kirine!! Çavên xwe ji van kiryarên dewletê girtine û bêdeng in! Xêr e? Gelo armancên dewleta Tirkiyê çine ku di rewş û mercên wiha hesas da dest bi van manevran dikin?! Gelo ma ev ne durûtiye? Ger ne durûtî be, aya hikûmeta AKPê nikare di parlemanê da bi guherandina zagûnan, bi awayekî resmî pirsgirêka Kurd çarser bike? Ma ew jî ne neviyên wan Osmaniyan in yên ku bi dek û dolabên xwe wexta xwe hemû Musevî(Yehûdî) jî li Îzmîr û Stenbolê kirine mislmanên Şafiî?! Ma hemen Kemalîst nebûn ku di 4ê Adara sala 1925an da bi zagûna Takriri – sûkun bi hezaran Kurd ji warê bav û kalên wan dûr xistin? Dîrok der barê van hovîtiyên nejibîrbûyî da wiha dibêje:“ 4´ê adara sala 1925´an ji bo berfireh nebûna serhildana Şêx Seîdê Pîran qanûna Takrîrî - Sûkun di civîneke awarte da ji aliyê parlemana Tirkiyê ve hate pejirandin. Mehkemeyên Îstiklalê jî hatin sazkirin û Kemalîstan li bakurê Kurdistanê dest bi sirgûn û qira Kurda kirin.“

Di salên 1970an da Bulent Ecvît jî li Colemêrgê gotibû: “ Eslê me jî Kurd e“ û li pey vê gotinê Kurdên nexwende û cahêl jî hem dengê xwe dan partiya wî û hem jî navê gelek zarokên xwe yên nêrîne kirin Ecevît û Bulent.!!

Ew di tengaviyê da serî li hemû rê û dirba didin. Îranî jî wihane. Dema ku Kurd di warê leşkerî û siyasî da bihêz dikevin, rayedarên Tehranê dest bi wesf û medha Kurda diken û wan weke:“ Îraniyên herî esîl, parêzvanên sinorên welat, mêvanperwer û xwedî yekemîn imperatoriya Arîyan û...“ binav diken.!!

Wey û hezar cara ax ji destê Kurdên nezan û paleyên xelkê. Mixabin em Kurd zû tên xapandin û hêşta jî dagîrkerên Kurdistanê dema ku bixwazin, rihet deng û hêza me ji bo berjewendiyên xwe bikar tînin.

Niha pirsa min ji kesekî weke mamosta Şivan Perwer ev e: “ Gelo ma tu ji me baştir Tirk û siyaseta wan ya durûtiyê nas nakî?! Li hemberî gotinên ku Erdogan der heqa te da kirin, çima tu wiha bêdengî? çima qêrîna te weke salên 1970 û 80an nagehe guhê hemû Kurdên cîhanê û netewa xwe ya bêdewlet bi sextekariyên dagîrkerên welatê xwe nahesînî? Ma di nava Kurda da deng ji dengê te bitesîrtir û bilindtir heye? Min hevpeyvîna te ya bi TRT1 ra dît, lê bersivên te têhnatiya min neşikand. Min bi awayekî êltimas û heza te ya ji bo vegera Tirkiyê di bersivên te da his kir(hîvîdarim ez şaş bim), lê te di mercên wiha da dikarî weke pêxemberekî hişyarkirina cahêl û bindestan rolê xwe yê pozîtîv bilîsta.

Mamosta can: Îro Kurd li bakurê Kurdistanê pir bihêzin û têkoşana wan ya siyasî di sewiya xwe ya herî bilind da ye. Lê Şivanê Kurda, Şivanê ku salên berê di vê rensansê da xwedî rolekî pozîtîv bûye, îro bêdeng e û ne li kêleka doza xwe ya li bakurê Kurdistanê ye. Mixabin, hezar car mixabin.

Temsîlkarên Tirka vê bêdengiya te dibînin û ji bona wê jî yekî weke Erdogan dibêje:“ Ez Şivan Perwer dixwazim...“ Çimkî çûyîna te yê bi navê AKPê be û ew jî bixêra te yê bi milyonan denga li Kurdistanê qezenc biken. Lê mamosta Şivan dixwazim ji tera bêjim ku armanca rayedarên dewleta Tirk ji vî karî ev in:

1. Ew dixwazin dengê Kurda yê herî bilind, dengê sedsalê û şiyarkirina netewa Kurd ji bo berjewendiyên xwe yên siyasî bikar bînin. Çimkî ew niha baş dizanin ku li bakur û başûrê Kurdistanê, Kurd hem xwedî hêz û hem jî pergal(sîstem)eke wan çêbûye. Ma ji bîra te çû ku heya duh wan li ser serokên başûrê Kurdistanê çi digotin û ew wek serok eşîret û paşvero binav dikirin?! Li masmediya Tirka temaşe bike ka çawa hem Kurda tehqîr diken û hem jî siyaseta xwe ya asîmîlasiyonê bi çar gavan didomînin. Tu çima strana vê rewşê nabêjî mamosta? Ew qêrîn û hissên te yên wan salên berê li kû ne heyrana te bim?!

2. Ew dizanin ku te di dirêjahiya jiyana xwe ya hunerî-siyasî da ji bo Kurd û Kurdistanê heya roja îro pir kar û xebat kirine. Û bi vê ra jî tu êdî di dîroka Kurdistanê da xwedî karîzmayeke mezin û nemirî. Îstixbarat û serokwezîrê Tirkiyê li hev kirine ku vê mezinahiya te bi destê te bixwe bişkênin û di çavê gelê Kurd da“ Efsaneya Şivan Perwer ji Xerareşka Jêrîn heya Kurdistana Mezin“ weke çiyayekî berfê bihelînin.

Bi vî awayî ew dixwazin bi tîrekê li du nîşana biden.

Hîvîdarim ku tu nakevî vê davikê û hema weke berê serbilnd, wek çiyayê Agirî nalivî û ji helwesta xwe ya Kurdperweriyê nayê xwarê. Çimkî di nava Kurda da yên gelek mezintir û bişexsiyetir ji Erdogan li pişta serê te ne û tu mineta te bi wan kesan tune yên ku dibêjin:“ Kurd ne miletin...“

Mamosta Perwer ji bîra neke ku: Heya li bakurê Kurdistanê pirsgirêka Kurd çarser nebe, Kurdên perçeyên din nikarin bigehin daxwazên xwe yên siyasî. Heya niha me Kurda li başûr û rojhelatê Kurdistanê derfetên mezin ji dest dan. Amerîka ji bo xweziyên xwe yên demî Kurd wek xulaman bikar anîn û îro jî dibêjin:“ herin li Bexdayê pirsgirêka xwe çareser biken û PJAK jî çimkî li dijî rejîma Îranê ya îslamî(!!) şer dike, terorîst e!“.

Ev jî ecêbeke dinê ye mamosta Perwer ku Amerîka ji bo berjewendiyên xwe heta bi rejîmeke totalîter û terorîst ya weke Îranê re jî dikeve nava peywendiyan û Kurdên bindest û şoreşger jî di çavên wan da dibine terorîst. Lê Kurdên bakur bi hizr, raman û dîplomasiya xwe rojekê yê biser bikevin. Te bixwe jî dît ku Ehmed Turk çawa bi Kurdî axaftina xwe wek Leyla Zanayê Tirkiye hejand.

Mamosta Perwer: keda te di dîroka siyasî-civakî û hunerî ya Kurda da pir zêde ye. Vê kedê weke canê xwe biparêze. Di van şertên herî hesas û rewşa siyasî-dîrokî da careke din bêtir ji salên berê were û li kêleka wan zarok, xort, dayik û xwîşkan bisekine, yên ku li Wan, Batman, Amed, Riha, Stenbol, Colemêrg, Urmiye, Mehabad, Qamîşlo, Sine, Kirmaşan, Efrîn, Dêrik, Seqiz, Mako, Xoy, Selmas û di peyvekê da li hemû Kurdistanê bi şev û rojan li ser piyane, ji bo azadiyê diqêrin û dikevin ber gole, şikence û heqareta polîs û eskerên Tirk, Ecem û Ereban. Di bin postalên wan da têne herişandin û bi sed rengan sivikatî bi wan tê kirin. Ma tu van dîmenên tirajîk nabînî mamosta?!

Demekê te ji Pêşmergeyan re xwend û ew jî li hemberî Beesiyên cinayetkar û xwînrêjên komara îslamî sekinîn û bêtir şer kirin, îro çima tu „Strana Gerîla“ jî nabêjî? Ma tu wan şêrekeç û xortên qehreman nabînî ka çawa şerê man û nemanê ji mayîna me Kurdên bêdewlet ra dikin? Ka straneke dîrokî li ser vê rewşê bêje mamosta ku weke ya li ser Helepçe, Dêrsim û Agirî û hwd dîsa dîrokê bihejîne. Ma ferqa di navbera „gerîla û Pêşmerge“ da çi ye? Gelo ma her du jî ji bo armanc û dozekê ne mîna hev şervan û canfîda ne?

Ji bîra neke ku ev hez û qêrînên T. Erdogan îro hene, lê piştî ku kerê wî ji pirê derbas bû û di helbijartinên 29ê Adarê da biser ket, eyara zêrê kesên weke te jî yê bigehije qîmeta xwe ya herî erzan.

Hîvîdarim tu wek lîderekî siyasî-çandî vê rewşa îro baş binrxînî, rind bibînî û siberojê dîrok xerab li ser kar û xebata te nirxandina neke. Her straneke te li ser doza gelê te romanek û çîrokeke ku di mejiyên bi wijdan û dîroka rastîn da nayê ji bîr kirin.

Hîvîdarim partî û hereketên siyasî jî vê rastiyê bêtir li ber çav bigirin ku Şivan Perwer di dîroka Kurdan da xwedî rolekî çawa bûye û keda wî ya di şiyarkirina gelê Kurd da ji bîra xwe neben. Bila sedî 90 qencî nebine qûrbana sedî 10 şaşiyên biçûk. Şivan û keda wî gerek weke mîrasekî dîrokî û nemir bê teqdîrkirin.

01. 03. 2009 Elmaniya

çapkirin