Şivan Perwer û TRT Şeş!!

Kakşar Oremar, kakshar_oremar@yahoo.de

Birastî jî ger Şivan here û di TVyeke wiha da konsertan pêşkêş bike an jî bibe xwediyê bernameyeke heftane, ezê ji huner, siyaset û kesayetiya wî bikevin şûbhê. Gelo ma ger kesek li dijî sîstemeke înkarger û xwedî hemû xisletên xwe yên kolonyalîstî, tenê bi deng û saza xwe şer bike yê heqareteke wiha bipejirîne? Ma Şivan Perwer nebû ku bi dengê xwe yê zelal û hunera xwe ya bilind tevkujiya Dêrsimê, xwînmêjî û xwînrêjiya Kemalîstan li Agirî û Geliyê Zîlan, canfîdayiya Pêşewa Qazî Mihemed li Mehabadê, mêrxasîya Mistefa Barzanî, berxwedana qehremanê milî Mezlûm Dogan, şehadeta tijî mezlûmiyeta Dr. Qasimlo li xerîbiyê, name û evîna Abdulah Ocalan, hunera Delîl Dogan, hesret û xweziyên Cegerxwîn û... bi rêya kilamên xwe yên cewherdar hem bi bîra me anînin û hem jî bi vêra sewiya rewşenbîriya siyasî-civakî di nava Kurdên Kurdistana mezin û cîhanê da bilind kir?! Kesekî wiha çawa dikare hema rihet biryareke wiha xerîb û dûr ji çaveraniyê bide? Ma negotine hunermend neynika êş û elemên civaka xwe ne? Gelo di vê derbarê da ma Şivan Perwer di warê exlaqî û siyasî da xwe berpirsyar nabîne? Ewê bi kiryareke wiha ra çawa bersiva keda xwe ya dîrokî bide? Ma wî nav û navdariyek wiha mezin wiha erzan qazanc kiriye?!

Dema em li Îranê xwendekar bûn, beriya herkesekî me bi rêya deng û hunera mamosta Perwer cewher û felsefeya Kemalîzimê nas kir. Me bi riya stranên wî zanî ku li bakurê Kurdistanê bi milyonan hemwelatiyên me di bin ewrê reşê stem û tartiya asîmîlasyona komara Tirkiyê da dijîn. Me bi rêya dengê wî yê tejî hezar hissên germ zanî ku Tirk kî ne û çawa 25 milyon Kurd ji hemû mafên wan yên sirûştî û netewî bêpar kirine. Di wan şert û mercan da guhdarkirina stranên Şivan li her dera Kurdistana mezin dihate wateya standina hukimê kuştin an jî îdamê. Niha gelek şahid hene ku dibêjin di çaxê desthilatdariya dîktator Seddam Huseyin da gelek ciwanên Kurd ji ber kasêtên wî hatine îdam û tîrbaran kirin. Dema rejîma îslamî li Îranê hat ser kar, gelek kes bi sûca hebûna kasêtên Şivan hatin kuştin, girtin û wendakirin. Îro jî kes nizane çi bi serê wan hat!!. Maosta Perwer di dîroka hunera Kurdistanê da xwîndingeh e û îro bi sedan şagirdên wî di qada xebata hunera şoreşgerî da ketine ser rêya wî. Êca ez qet bawer nakem ku mirovekî wiha hunermend û mezin ewqas sade be û hema ji nişakave bê karekî wiha bike, an jî hemû pirên pişta serê xwe xerab bike û qedera xwe ji qedera gelê Kurd cuda bike.

Dengê Şivan û Bîranînek

Qet vê bîranîna xweş ji bîr nakem: Sala 1988an dema ku Helepçe bi çekên kîmyayî hate bombe kirin, li xerîbiyê dilê me teva pir teng bû. Di malê da hizur nema. Em hingî li bajarê Tewrêzê bûn. Wê rojê bi bihîstina xeberkî wiha em tev ji bo xerîbî û bêkesiya Kurda giriyan. Bêdengiya cihanê li hemberî vê cinayeta mezin teisîreke pir nigatîv li ser hest û riha mezinên malbatê danî. Demek derbas bû. Kekê mnin Hesen ji babê min re got:“ babo dibêjin Şivan li ser qetiama Helepçê stranek gotiye. Ezê îro êvarê herim Urmiyê û sibe zû kasêtê bînim û bêm. Tu çi dibêjî?“ Babê min bi dilekî tejî êş jêre got:“ başe babo, here, lê di rê da şiyar be kes kasêtê nebîne. Carekê pasdara li ser kasêteke wî têr û pir li birayê te xistine, min gelek pere xerc kirin heya min ew ji destê wan çeqela deranî, tu jî nekeve destê wan lawo... zû here û zû were”.

Hesen çû û roja piştre danê êvarê vegerî. Lê di rûyê wî da xemeke giran hebû. Sedem ew bû ku wê stranê li herêma Urmiyê bandoreke gelek li xelkê kiribû û Hesen jî bi vê rewşê ra pir nerihet bibû. Bi her awayî em wê êvarê tev bi bihîstina strana Helepçe giriyan. Hêsirên jiyana li xerîbiyê bi bihîstina dengê Şivanê rêber û hunermend hinek êşa dilê me kewand. Hingî babê min tiştek got ku pir watedare:” Kuro law bi Qûrana kerîm û Xûdayê mezin kim dengê vî malnexerabî ji hezar top û bombeyan bi bandortire. Ma heya me kesên wiha hebin Kurd yê bimirin?! Ne.. ne... ne mumkine, ha ez niha dizanim ka çima dewletên dagirker ji dengê wî ditirsin...”

Dengê Şivan hingî di çavê me da weke wehiyeke îlahî û esmanî bû. Hemû zor û tirsa neyaran li aliyekî û Şivan û hunera wî jî bi tenê li aliyekî, dîsa şêrê meydana şer Şivan Perwer bû.

Armancên AKPê çine?

Armanca AKP ji çêkirina TRT şeşê xuyaye: Li bakurê Kurdistanê hereketeke siyasî, mezin û bihêz heye. Gerîlayên qehreman û rêzanên doza bi şan û şeref, bi şer û siyaseta xwe ya bi hevre hêdî-hêdî hêlîna dagîrkerên Tirk ya hezar salan li bakurê Kurdistanê anîne halê hilweşînê. Kurd êdî ne Kurdên berêne, DTP û PKK´ê her yekê di warekî da nefesa rayedarên AKP`ê li Kurdistanê di singê wan da anîne halê fetisandinê. Tirk baş dizanin ku bi vê rewşê ra ew êdî nikarin kela Kurdîniyê li bakurê Kurdistanê biherifînin an jî feth biken. Êca dixwazin bi rêya zimanê me, ji bo armancên xwe yên demî TRT şeşê vekein. Li derve jî bi milyonan dolar û Euro xerc dikin ku Roj TV bi yekcarî ji holê rakin. Herwiha xala herî balkêş ewe ku di zagunên sîstema serdest da hêşta jî zimanê Kurdî bi awayekî fêrmî li hemû erdniugariya komara Tirkiyê yasaxe. Ew tenê dixwazin di van çend mehên mayîn da propagandeyên ji bo hilbijartinan li dijî aliyê Kurd biken. Wan li ber e ku bi rêya hinek Kurdên xwe firoş di vê qadê da jî lîstikekê bi serê Kurda bînin. Ma ew ne neviyên Osmaniyên bi dek û dulabin?

Di rewşeke wiha da AKPeyî dixwazin ji kesayetiyên Kurd yên xwedî karîzma sûdê bistînin. Lê bawer nakem Şivan Perwer bikeve vê davikê.

Xweziya arşîva MITê ya 30 salên derbasbûyî niha biketa ber destê Kurda, hingî Şivan jî têda me teva dê bidîta ka wan li ser wî hunermendê mezin çi nivîsîne û çi hisab ji paşeroja wî ra kirine. Niha ew gorên har bi kîjan dilsozî û demokrasiyê ketine wê fikrê ku ji „Tirkiyên çiyayî“ re Tvyan veken û hunermendên Kurd yên naskirî ji xwe ra bikar bînin!?

Kirnî çi dixwazin?

Elbete ji bîr neken ku: hinek çeqel û berjewendîperest hene ku ji bo debara jiyana xwe ya rojane belkî dixwazin ji hisên Şivan yên hunerî û Kurdistanî sûîstimal biken û wî razî biken ku here TRT Şeşê, lê ew bêexlaq û bêpirensîp gere bizanin ku bi karekî wiha ra ew tabût û kefenê Şivan jî pêra dişînin!. Wî dikujin, bi zindî wî dimirînin û hemû keramet, xebat û keda wî ya salên dûr û dirêj bera avê didin. Ma evane jî ji xwe ra dibêjin Kurd? Ma ew însan nin? Kirniyên ku hînî mijadina xwîna mirovan bûne û tenê li ser pişta xelkê dijîn, şermê ji dîroka tejî êş û xwîna gelê Kurd naken?...

Hîvîdarim mamosta Şivan Perwer zêdetir ji salên berê bi wezîfeyên xwe yên siyasî-dîrokî bihese û êdî xwe ji van cûre kesên wiha dûr bigire. Em hê jî têhniyên berhemên wî yên nebihîstî û nûne, berhemên ku divê weke:” Helepçe, Xewna min, Lo Mamo, Ez Xortê Kurdim, Kîne Em, Agirî Xwîn digirî, Hevalno hoo, ” û bi sedan kilamên wî yên din ku bêmirin bikevin rûpelên dîrokê.

Şivanê ku ez nas dikem naçe TRTê, izinê nade ku heta stranên wî jî li wir bên weşandin. Rolê ku îro ostad Mihemed Riza Şeceriyan li dijî rejîma paşveroya Îranê dilîze, pêwîst mamosta Şivan jî li dijî înkargerên Kemalîst û sextekarên AKP`eyî bilîze. Pêwîst nake ez behsa Victor Jara bikem ka ji doza gelê xwe ra çi kir û çawa şehîd bû.

Di karê xwe da Şivan ji rêber û partiyên Kurd ne kêmtir e û ne jî kêmtir xebitî ye, lê mixabin di van salên dawiyê da dengê wî êdî nagehe çiyayên Kurdistanê. Nizanim bilbilê sedsalê, sultanê stran û awazên şoreşgerî çima ji çiyayên qehreman perwer qehiriye?!! Yê ku ji aliyê helbestvanê milî Ebdulah Peşêw ve wek „sefîrê huner û strana Kurdî“ hatiye binav kirin, êdî weke salên berê aktîv nîne.!! Ma ew nizane ku tehemula çiya mezin û Şivan Perwer ji çiyan jî mezintire?

Gelek kesên din diçine TRT Şeşê ku bistirin û kar bikin, lê hemû li aliyekî û Şivan bi tenê li aliyekê ma. Gelo sedem çiye ku Kurdên hemû deverên Kurdistanê ji bihîstina xeberekî wiha xemgînin?!! li gor min sedem ewe ku êdî Şivan di dîroka hunerî-siyasî ya Kurdan da bûye mîrasekî nemir û dîrokî. Reakisyon tev ji vira tên. Weke din jî ma ji vir û pêda Şivanê Kurda muhtacî nav û şuhretêye? Ma pêdiviya wî bi pere û malê dinê heye?... bawer nakem, çimkî bi qasî ku ez dizanim di van her duyan da jî ew bêkêmasiye.

Wek Kurdek xûlamê axa Kurdistanê: rica û daxwaza min ji hemû partî û rêxistinên siyasî li Kurdistan mezinewe ku haya wan ji Şivanê xwedî emek û keda mezin hebe. Mirovên wiha her çend sed salan carekê tên rû erdê. Werin em tev nebin “zindîkujên mirîpereset”. Heya nirx û eymetên me yên netewî saxin bila qîmet û hurmeta wan bê girtin û zanîn.

Wezîfeyên me di roja îro da!

Bakurê Kurdistanê niha ji her hêlê ve xwedî rewşeke xwe ya taybetîye. Ji berw ê jî gere em bizanin ku: Di roja îro da ji zarê 7 salî heya kalên 100 salî gere destê xwe bidene destê Kurdên bakur. Çimkî ev hilbijartin yê di paşerojê da qedera gelek tiştên din bidin diyarkirin. Kilîla çareseriya pirsgirêka Kurd li bakurê Kurdistanê ye. Heya derya nehê rizgar kirin, çikandina golê yê ji aliyê neyaran ve hêsantir be. Hîvîdarim mamosta Şivan jî di nav da, hemû hunermend, rewşenbîr û bi ser hev da hemû Kurdên Kurdistana mezin bi girîngiya van wezîfeyên xwe yên dîrokî bihesin. Ji ber ku ji xeynî serkevtinê me tu rêyeke din li ber nîn e. Bila poşmanî dîsa nebe bi para me. Pêwîste em dûrbîn bin û aliyê din yê çiyan jî bibinin.

20.12. 2008 Almaniya

çapkirin