dengbêjê dengxweş

Kamran Simo

’’ de lê lê

aax de lo lo ‘’

siya evînê firandin

gulên xoşewîstiyê

di nav gezgezê de çandin

rondikên dayê

bi xwîna bavo

di gewriya biharê de fetisandin

xewn

bi dirihtêlan tirsandin

ez bûme benîştê

devê pîrên bêdiran

dûpişkê xwekuj

kurmê darê

se yê

bi dîwarê

dêr û mizgeftê ve mîzkirî

destmala yarê

xwînbirîna min vedixwe

leyîstoka zarokiyê dizîn

keftar çîrokbêje

berx destên gur dialisin

’’aax de lê lê

de lo lo ‘’  

dîsa

melodiyên kevin?

melodiyeke din

bistêrêne dengbêj

melodiyeke

dengê xwînê jê nayê    

bêje

stranekê bibêje

bila cuda be

ne di himbêza dayikê de

mirina zarokan

ne serpêhatiyên feriştên kenok

ne ’cinê di misîn’ de be

ne jî çav

li hêviya qoşxana qul be

stranekê bibêje

‘’ne lo lo

ne jî lê lê’’ be

bila

bayê stêra berbangê

bêhna evînê werên

ne derew

ne jî rast be

bi awirên xeyala min azad be

di rastiya jînê de dîl be

dengbêjê deng xweş

straneke wisa

ji min re bêje! 

5.11.2005

çapkirin