Melûliya bêdeng

 Kamran Simo Hedilî

baskên şadiyê şikestin

çem û kanî ziwa bûn

kulîlkan bêhn daweşandin

heyvê ken veşart

asîman xwe bêstêr hişt

”girî karê mirovê lewaze” dibêjin

janpayîza awirên te

ez pir lawaz kirim

rondikên sor û zer  

zinarê hezkirinê nimandin

sir û seqema bakur

xeyala te maç dikin

ken û giriyê van bajaran

di guhên min de

zengilê têkçûnê dijenin

bazê xweragirtinê firî

bêrîkirin

di bêdengiya kevoka birîndar de

roj

di kirasê şevê de

bihar

di êşa pişkova hinarê de

reng

di agirê bêrengiyê de

hêvî

di asoyê dûr de dinal in

30.09.2008

Kamran Simo Hedilî

çapkirin