Xwe nîşan bide! 

 Kamran Simo

dil

serxweşê awazên kewan

kulîlkên çiyan

serkeftinên winda ye

çav

li teşîrêsiya xeyalên te 

di şadiya xwe de mest in 

di tenêtiya xwe de

tu afirandin

da werê têgihiştin

rojên di şevê de veşartî

fikirê min î

di fikirkirina te de bêmefer

şev jî

roj jî

di çavên min de

nîgarkêşên qasidê hatinên e 

ala winda  

kolanên qeşagirtî

oda tarî

henasa xewnên te ne

xwe nîşan bide 

da jêderên dîtinê tûre nebin

te nebînin

naxwazin tiştekî din bibînin

deriyê xwe digirin

ji xunava mijgulan re

çêja gotinê nîne

ku kenokiya te

jînê wernegerêne çira û findê

stranên hilbijartî

daxwazên zaroktiya qurifandî

navê hatî jibîrkirin

di awazên te de

hatine veşartin

Arîna

di bêdengiya xirbihên Hatuşa de

dinalê

demderengiya êvarê

werzê jîna mayî  

 xeyalên baskşikestî

min difiroşine derewên tî 

şadî û rastî 

mane li bajarên mirî

lehengî 

di serhildana xwe da fetisî

Mîtanî, Hatî û Hurî

di xewn û xeyalên min de

bûne diyarî

kamran simo Hedilî

11.01.2007

çapkirin