Çar Çirûskên Helbestî 

Konê Reş

Qamişlo, Zivistana / 2010

 

- 1 -

Ji min re gotin:

Ma tu ji berdewamiya qenciyên xwe

Bi xeraban re

Şerm û fedî nakî?!

Min li wan vegerend:

Ez ê çima ji qenciyên xwe şerm û fedî bikim,

Bela ew ji xerabiyên xwe şerim û fedî bikin.

 

- 2 -

Gelek leheng di vê beriya me a Mêrdînê re

derbas bûne;

Hin bi şûr û mertalên Restemî,

Hin bi tiving û rextan pêçayî

Hin bi kom, koloz û simbêlên badayî..

Tev mirin bûn ax,

Me navên wan jibîr kir..

Bi tenê di xaka vê Beriyê de

Navê evîndariya Derwêşê Evdî ji

Edûla Zor Temir Paşayê Milî re,

Manye zindî.

 

- 3 -

Qet min nizanîbû ku ew dostê min

Yê ku bi min re xayin ket û

Min deng ji xwe neanî,

Wiha qels û lawaz e..

Ta vê paşiyê min sehkir ku

Eşkere şerê min dike.

 

- 4 -

Di dilê her mirovekî de

Du gurên har şer dikin;

Yek di ber evîn û xêrê de,

Yek di ber kîn û şer de

Tu li kîjanî ji wan

Bixwedî derkeve,

Ew bi serdikeve.

 

 

Qamişlo, Zivistana / 2010

 

   

çapkirin