EZBENî – 6 –

Kurdistana Azad û Şoreşa Rewşenbîrî

 Konê Reş

((Kurd miletekî bindeste wê dûmana wî zêde be..))

Mehdî Zana

Hewlêr 01/04/2008

   Ezbenî ! emê ji serhildana 1991 ê ve destpêbikin. Berxwedan Serhildan û şoreş tev di yek cogê re derbas dibin. Belê gotina şoreşê an raperînê  ji tevan bêtir bi wate ye, nexasim di nav me kurdan de û bi tevayî di warê jiyana mirovan  û civata mirovantiyê de..

   Lê rewşenbîrî ezbenî an şoreşa rewşenbîrî tê wateya guhertinê, guhertina di hundirê civatê de, guhertina di cewherê mirovên wê civatê de.. Ango ew guhertina ber bi çakiyê ve, ew guhertina ku dikeve xizmeta xweşî û geşiya mirovan de…Lê dema ku rewşenbîr bi rola xwe a guhertinê ranebe, ango bi erkên xwe yê rewşenbîrî ranebe, hingê tu bihayê wî rewşenbîrî nîne û navekî vala ye.. wek ku kurdan ji mêj ve gotiye: Navekî mezine li ser gundekî wêrane.

   Erê Ezbenî! Dema ku şoreş xwedî rewşenbîrî be, tevî ku şoreş bê rewşenbîrî nîn in, û şoreş nikare rewşenbîriyê tevî li dor xwe kom bike.. Şoreşa rewşenbîrîyê, a ku guhertinan di hundirê civata xwe de dike, kesim û cewherê civatê ber bi xweşiyê ve diguherîne..û wiha civata xwe li gor rêbaz û pilanên xwe ji bo xweşî û geşiya welatiyên xwe di çarçoveke bi yasa û durist re derbas dike.

   Ezbenî ! Şoreş ji rexekî mezin ve rewşenbîriye, erê şoreş rewşenbîriya herî bilind e, a bi afirêner e, a ku bi derd, êş û jananên mirovan ve girêdayî ye..a ku jan û kulên milet çareser dike..Ji ber ku karê rewşenbîriyê avakirina mirovê çak û duriste di gel ku xêr, xweşî û hezkirinê di nav cemawer de belav dike..

   Ezbenî ! Dema ku şoreş mezin dibe û ber bi dewletbûnê ve diçe û dibe dewlet, mîna Kurdistana me a azad, hingê ew dewlet dibe welatê tev mirovên ku têde dijîn û ji mafê tev welatiyan e ku têde bijin, ji axa wê bixwin û vexwin, payebilind bi zimanê wê biaxifin û xwe paye bikin… Wek ku çawa ew dewlet a şehîdên kurdistanê ye, wiha jî a tev welatiyên wê ye.

   Belê ezbenî! Dema ku dewlet bibe a tevan, pêwîste tev jî bervedêriyê di ber de bikin, wek ku bervedêriyê di ber berjewendiyên xwe yên taybetî de dikin.. Pêwîste jî tev di bin destûr û yasayên wê dewletê de bilivin, ew destûr û yase, cihê rêzgirtinê bin..

   Raste ezbenî bê rexne nabe, divê rexne hebin û eger karekî baş bê kirin, pêwîste rewşenbîr wî karî pîroz bikin û eger karekî xerab bê kirin pêwîste rewşenbîr wî karî protesto bikin.. Ango divê rexne ji dewletê re alikar be, ne rexneyên dewletwêran bin, ew rexne li gor desrûr û yasayên wê dewletê de bin. Ne ku rexneyên tuj, bêheq û bêbextî bêne û bi zikreşî buyer bêne mezinkirin û ji wê dewletê re bibin asteng û kelem.

Ezbenî Goşt bê hestî nîne, kemasiyên me  gelekin lê divê em bi awayeke erênî rexneyên xwe bikin da ku em bi pêş de herin, û hin bi hin ew kêmasî nemînin. Em ji sifir destpêdikin ezbenî..

  Lê ezbenî pirsa giring eveye, gelo rewşenbîrî bi karê xwe yê pêdivî radibe? Ev pirs ji me tevan tê kirin, di vê rewşa zor çetîn û dijwar de, ku dewleta me a nû(Kurdistana Azad) têre derbas dibe û bi taybetî di warê rewşenbîrî de. Ne tenê rewşenbîrî çekê vê dewleta me a nû ye, belê ew çekê herî giringe, çekê tekaneye yê ku bazar li ser nabe û qet em jê nayên tazî kirin. Tu hêz di dinayê de nikare me ji rewşenbîriya me bi dûrxîne, bi tenê tiştê ku em karin xwe pê bi parêzin rewşenbîriya me ye. Rewşenbîriya me, rewşenbîriyek netewîye, mirovantiye, neyartiyê ji kesî re naxwaze. Di pêvajoya dîrokê de rewşenbîriya me a mirovê zilim û zor lê hatiye kirin, a ku şerê wê bi tundî bûye, tevî ku di nav salan re hatiye dizîn û gelek hewildan hatine kirin ku nemîne..Rewşenbîriya me a şaristanî, diyalog û lêborînê ye, û welatê me wek ku tê gotin: Landika şaristaniyê ye…

   Ezbenî! Gelekî zore ku ez di vê nîvgotarê de qezencên şoreşa rewşenbîrî yên ku Kurdistana azad pêk anîne an vê nîvdewletê di warê rewşenbîriyê de pêk anîne bihejmêrim û bînim ziman.       Bêguman ji sala 1991 de û ta roja îro gelek qezencên bi rêk û pêk hatine kirin, ji çapkirina pirtûkan, festîvalên rewşenbîrî, pêşangehên pirtûkan, konferansan..ku ji her çar perçeyên kurdistnê beşdarî di wan de kirine..û ku roja îro li Kurdistana azad zêdetir ji 60 dezgehên  çapemeniyê hene. Li Hewlêrê 29, li Dihokê 5, li Silêymaniyê 24 û li Kerkûkê jî 2 dezgehên çapemeniyê hene.

  Belê ezbenî! Qezencên ku şoreşê di warê rewşenbîriyê de pêk anîne pirin, di vê lezê de nikarim wan bihejmêrim wek ku min got. Belê îro ji me tê xwestin û bi berpirsyane ku em van qezencan biparêzin û bi pêşxînin, ne tenê di kesim û hejmarê de, belê di di cewher û naverokê de… De werin em rewşenbîriyê bikin çekê xwe derbarî êrîşên ku ji hawîrdor ve têne me.. 

   Erê ezbenî! Li gor vê pêvajoyê pêwîste her rewşenbîrek ji bo parastina Kurdistana azad  bixebite û her wiha biparêze, hebûna me di hebûna vî peçeyê azad de ye.

Konê Reş

Qamişlo  05/04/2008

çapkirin