anmeldung

Welatîno ! Binxetîno !

Konê Reş ( Di 48 saliya damezirandina Partî de )

Welatîno !

Niha û ne sibe,

Pêwîste em zanibin;

Em kîne, me çi divê û me çi kiriye..?!

Îro, bi rengekî awarte

Pêdiviye ,em cih û nasnameya xwe nîşan bidin..

Pilanên paşerojê ji pêvajoya xwe re diyar bikin.

Piştî 48 salan ka berê tevgera me li kû ye ?!

Pêwîste em bigihêjin kûderê ?!

Rêkên ku me bigihînin armancên me

Çilo û çawa ne..?!

Kîne pêşkêş û zanyarên me,ku berê kerwan me bidin oxirê û

Bi pêşde bi livîn in ..?!

Mîna Dr.Nûredîn Zaza,Osman Sebrî û

Vê paşiyê şêxê şehîd Maşoqê Xiznewî...

Binxetîno !

Paşmayînê em westandine

Pirbûna navê rêxistinan em şaş kirine...

Weşandina belavokên berberiyê em gêj kirine..

Bîranîn û serboriya damezirandina Partî ya 12 çuqlî

Em ji hev belawela kirine..

Gewlo ! Raste : Xeta xwar ji ga yê pîre ..?!

Welatîno !

Şiyar bin û pêlavên xwe baş di lingên xwe de bişidînin..

Xweş zanibin em di navbera hebûn û nebûnê de ne..

Piştî 48 salan hêj ,

Nasnameya me,zimanê me,adat û teqalîdên me

Li ber talanê ne...Gelo ! Çare çiye ?!

Binxetîno !

Niha û ne sibe..

Pêwîste em di ser tevan re bin..

Welatînî di ser hoz û êlê re be..

Pêwîste em xwe amade bikin

Ji dermankirina birînên Binxetê re û

Ji birînên wê pirtir nîn in..

Welatîno !

Pirbûna birînên Binxetê

Bi kêrên hin welatiyan in û

Gelek jî ,bi kêrên heval û hogiran in..!

Û yên herî pirtir bi destê neyar in welatîno !

Mêzekin ,bê çawa mîlên demê bi paş de vedigerin..!

Mêzekin bê çi li Qamişlo qewimî û di qewime ?!

Û çawa nasnameya kurdî di bazara xeraban de tê firotin ?!

Piştî 48 salan

Neyar bi xurtî li dergehê me dide û

Xweş dizane bê çi divê ?!

Hêj em nizanin bê me çi divê ?!

Gelo raste,piraniya serokên partiyên me

Wek ku heyranên canê xwe û

Razîkirina jinên xwe ne

Wiha ne heyranên mafê gelê xwe ne !!

Kanî perwerdekirina niştimanî di nav gel de ?

Kanî sirûdên Cegerxwîn, Osman Sebrî û Namî ?!

Ku naşî û xort bi wan bêne perwerde kirin ?!

Çima em dûrî perwerdekirina niştimanî ketine ?!

Çima, em nema wan destên avakirin û danê dibîn in ?!

Û destên ku bi berdewamî dibêjin kanî ..Li ber çavên me ne ?!

Werin Binxetîno werin !

Em ji nû ve destpêbikin û dergehê kevin bi tev kul,

Êş ,jan û birînan ve bigirin

Îro ne sibe, bi coşeke mezin û hêviyên gur destpêbikin;

Qamişlo û Binxetê ji nû ve ava bikin, erê ava bikin..

Welatîno !

Werin, em wan kesên ku

Ji dil û can xwe di ber welat de westandine

Xelat bikin û wan

Kesên ku bazirganî bi navê welat kirine û dikin û

Kesên ku bi dizî ji europa zêrevaniya me dikin !!

Navê wan eşkere û belû bikin..

Welatîno !

Piştî 48 salan

Pêwîste em pêlekê rawestin

Bi ponijin...û her yek ji me pêleke dirêj

Bi xwe tenê re raweste,

Da ku em ya rast bi zelalî bibînin

Ji ber ku em şaşomaşo,

li ser çar diryanan mane...

werin em pêlekê rawestin û

Bê ku em derewan bikin an

Em tawanên belaş bidêrin,

Wek ku hin didêrin û

Bi dizî bi dûv kerwanê neyar de dibezin..

Welatîno derenge !

Pêwîste em ji niha ve bilivin û

Her yekî xwedî maf be

Em mafê wî bidinê..

Ta ku em karibin bibin welatiyên

Binxeta şêrîn, erê Binxeta şêrîn.

Konê Reş

Qamişlo 14/06/2005

çapkirin