Hawarname

 Merwan Osman, Qamişlo 14 / 3 / 2004

Dîsa wek her caran, xwîna gelê kurd rijiya ji devan

Dîsa wek her caran, gelê me, bê çek, dest vala, tikî tenê, di nav naperûşkên xwînxwaran de ma.

Dike hawar,

 dike firyad

      dike fîxan

        bi qîrîna xwe re dibe qîrîn

                                   û qîrîn dimîne

 Lê jê pêve, tu kes hawara wî nabihîze

 Tu kes li firyada wî nabe guhdar

  Qîrîna wî qîrîn dima û qîrîn dimîne

Nijadperestên Baass li vê hêla mirinê

                                 weke hêla mirinê ya din

Gelê kurd ji xwe re kirine nîşan bi gulleyên faşistiyane

Ne tenê nêçîriya xewn û hêviyan ji mejiyan dikin

                                            Nêçîriya mejiyan bi xwe dikin

Bi kîneke zuha

Bi guştineke tazî

Bi raman û kiryareke nijadperestane

 gelê kurd dane ber xwe û berî dane serjêkirinê

Dîsa wek her qirkirinên berê

                Kesî li dor xwe nabîne

Dîsa wek her tunekirinên berê

                Bê xwedî û xwedan dimîne

Ji berê de, bê xwedî bû lê bi xwedan bû

Lê vê carê xwedanê wî pîrozbahiyê dide ewan gilleyên ku wî dikujin

Ewan gulleyan bi destên cîgirên xwe yên bêbext di sînga kurdan de diçîne

Dîsa wek her caran

Kurd, neviyên berf û xewnên revyayî,

Rondikên xwe bi sêrengên ala pêçayî zuhadikin

Û alê ji xwe re dikin qerqer û li bende tiştine ne diyar dimînin

Dibe ronîyeke ne pen, li pêş gorê, ji wan re bibe kêl

Dibe Mûhemed li nifira xwe poşman bibe

Dibe ew xewnên her revyayî ji wan re bibe gewde

Ji kurdan re, ji kurdan pêve kes palpişt tune

Ev hawarname

         Derbirîna dawîye ji xewnên me re yên revyayî û li zikmakî kuştî

Ev hawarname

        Rengvedana êşek her li dare

        Daxuyaniyeke ji gelekî her û her xewnên wî dirvin û têne revandin

Ji we pêve

Kurdên penagehan

Kes jêre nemaye

Hawara wî bi weye,

Hûn tenê jê re penagehin

Jêre bibin hawar

Jêre bibin penageh

Bêdengî gunehkarîye

Bêdengî hevkarîya qirkirinêye