Sipasname

 Merwan Osman,  Qamişlo 8-3-2004

Şahgeha bêdengî û tirsê ye,

Keleha çavgirtin û gemkirinê ye

Miringeha azadiya derbirrîn û ramanê ye,

Sûriya min e,

Dagîrkera min e

Xewn û mirina xewnên min e

Welatê min e;

         lê ez jê re ne hevwelatî me,

         ez jê re kerîkî pezim, bi çoyên bedroom ên tarî ajotî me

Tiyamata sedsaliya bîst û yeka ye

Kur û keçên xwe dikuje

Tariyê li ser serên her kesên xwe dibarîne

Her kesî,

           lal, pûç û bêhêvî dike

Li vê derê,

dera ne wek tu derê ,

dera wek her derê

Li bendî destê tijî ronî dimam

                             û hîn ez dimînim   

ew dest pîroz e

yê ku xewst misteke ronî

                  bavêje hundirê vê tarîgehê\suriya

Li hêviya dil-piran dimam

                             û hîn ez dimînim

ew dil, paktirîn dil e

yê ku xwest xwe bike pir bo..

giyandina dengên xaç kirî

li tarîtirîn xaçgeha deng û hêviyan

Ev Sipasname

Bi hêvîne dorpêç kirî strayîye

Bi bendewarîyên ew..

                            Kesên..

                             Xewn tazî

                             Laş lerizî

                             Devgirtî

                                        Dengdayî ye

 Firyada zindan-gora ye

Bihna rondik û xwîna girtiyan li ser zemîneya odeyên lêkolîna ye

Ev sipasname

Bi qasî ku dixwaze bibe

 nefeleke bihndayî,di destê we hemûyan de, yên ku we tevan alîkarî kir, di herifîna dîwarekî ji dîwarên vê tirsgehê, ya ku ji bêtirî 40 salî, ciyografiya suriyayê tev dagîker kiri ye, û gelê wê - kurd, ereb û yên din- dîl û ruswa kiriye.

Dixwaze jî,

 ku bibe fîxaneke bê rawestan û bangewazeke berdewam

Bo suriyayeke demokrat,wekhevî, û azadiyane..

Suriyayeke karibe mafê derbirîn û ramanê bide her kesên xwe…

Suriyayeke dadwer û sîng vekirî ji hemû hevwelatên xwe re…

Suryayeke gelê kurd têde karibe bigihê mafê çarenûsa xwe wek her gelên cihana me.

Suriyayeke bibe welat ji hevlatiyê re ne cîgeh be ji kerîyan re

Sipas

 ji we tevan re, ji hemû kesayetiyên ronakbîr,rewşnbîr,mafperwer, û siyasetmedar re.

Ji hemû dam û dezge û sazimanên mafên mirov û yên rewşnbîrî û ramyarî û hemû yên din re.

Ji Pena navnetewî û hemû şaxên Pen ê li her derên cîhanê , û bi rengekî taybetiyane ji Pena engilîzî û Pen a kurd re

Ji hemû komelmirovan re, yên ku li pêşya dadgeha bilind a ewlekariyê radiwestiyan, û yên ku bi meş û xwepêşandanan radibûn çi li welêt û çi li derve

Ji hemû komelmirovên ku pêşwaziya me kirin gava em hatin berdan.

Sipas

 ji her kesî re, ji her damudezgeyê re, yên ku bûn hevkar bo bilind kirina dengê suriyaya demokrat û wekhev, û yên ku dest dane gelê kurdistana suriyayê, ku karibe qêrîna mafê xwe yê neteweyî yê rewa, sînorên bêdengiyê bibuhurîne û piştgirtiyeke navnetewî bistîne.

Des bi dest,

 Bo damezirandina welatekî demokratîk, avakirî li ser bingeha wekhevî û dedweriyê, bê zor bê sitem bê cudakirina nijadperest

Gav bi gav

 bo cîhaneke vekirî ji her jîndarên xwe re, bê şer û bindestî. bi aram bi ewle,  û aştiyane