AGAHDARÎ
ji bo hemû endamên Navenda PEN-a Kurd

 Mustefa Reşîd

PEN-a Navneteweyî bi navê Komîteya Nivîskarên di Zîndanan da çalakiyeka berfireh ji bo piştgiriya navenda PEN-a Çîn destpêkir û ji hemû navendan xwest, ku ew jî di vê çalakiyê da beşdar bibin. Di destpêkê da Navenda PEN-a Australiya(Navend Sydney) helbesta helbestvanê Çînî Shi Tao wergerand zimanê înglîzî. Ev helbest ji hemû navendan ra hate şandin, ku her navendek wergerîne zimanê xwe yan jî hin zimanên din.

Navenda PEN-a Kurd jî di vê çalakiyê da beşdar dibe. Helbesta Shi Tao ji aliyê Mustefa Reşîd va li zimanê kurdî hate wergerandin û endamê me yê şerefê birêz Ricardo Gustavo Espeja ev helbest  wergerand zimanê spanî. Heya niha dora 60 navend di vê çalakiyê da beşdar dibin.

Wisa hatiye plankirin,  ku gava Agirê Olympiyayê ji Yûnan ber bi Çînê va biçe, helbesta Shi Tao jî hevaltiya wî bike heya ku di 08.08.2008-an da digihîne welatê Çînê. Gava Agirê Olympiyayê bigihîne kîjan welatî, divêt li paytextê wî welatî çirayek vêkeve û helbesta Shi Tao, ya ku li zimanê wî welatî hatiye wergerandin, hem bi nivîskî, hem jî bi deng (audio) bê bihîstin.

Navenda PEN-a Siwîsrî(German Centre) ku berpirsiyariya teknîkî hildaye ser milên xwe, ji me xwest, ku em wergera bi kurdî, hem bi nivîskî, hem jî bi deng(audio) ji wan ra bişînin. Me verziyona kurdî bi nivîskî û bi deng(MP3) ji wan ra şandiye. Wan ji bo vê armancê malpereka înternêt ya taybet afirandine, ku nexşeya cîhanê têda xuyadibe û gava helbest bigihîne kîjan welatî, çira li paytextê wan vêdikeve û helbest dikare bê xwendin û bihîstin.

Gava Navenda PEN-a Siwêsrî ji me xwest, ka gelo bila ji bo Navenda PEN-a Kurd çira li kîjan bajarî vêkeve, me bersiv da û got: Bila ji bo me kurdan çira li Amed, Qamişlo, Hewlêr û Mehabad vêkeve. Mixabin wan ev pêşniyaza me nepejirand û got, heger em ji bo her navendekê çar çirayan vêxînin, gelek pir dibe û ev ne mimkin'e. Gotin divêt hûn tenha bajarekî bi nav bikin. Em neçar man, ku em tenha bajarekî bi nav bikin û wisa me biryar da, ku bila ji bo kurdan ev bajar AMED be.

Ev daxwaza me hatiye pejirandin û roja pêncşemê, 03.04.2008-an ku Agirê Olympiya di Kurdistanê ra derbas dibe, dê çiraya Navenda PEN-a Kurd li AMEDê vêkeve û helbesta Shi Tao, ku ji aliyê Mustefa Reşîd va li kurdî hatiye wergerandin bi nivîskî û bi deng(audio) li ser nexşeya cîhanê xuya bibe.

Kesên ku bixwazin vê bûyera dîrokî ji dest xwe bernedin, divêt roja 03.04.2008-an di vê malperê destnîşankirî da li bajarê AMEDê bitikînin. Navnîşana malpera ku Navenda PEN-a Siwêsrî ji bo vê armancê afirandiye ev'e:

Malpera Taybet ya PEN-a Navneteweyî : http://www.penpoemrelay.org/  

Rûpela Navenda PEN-a Kurd di Malpera Taybet ya PEN-a Navneteweyî da

http://www.penpoemrelay.org/main/kurdish-centre

Hûn dikarin di malpera me da jî vê helbestê bixwînin û lê guhdar bikin: www.pen-kurd.org

Li gel rêz û silavên kurdewarî û hevalane.

Mustefa Reşîd

çapkirin