Çîrokên Şevbuhêrkan II

Ev pirtûka Çîrokên Şevbuhêrkan II ji 35 çîrokên gelêrî pêk tê û ji aliyê nivîskar û helbestvana me ya hezkirî Rûkiye Özmen ve hatine berhevkirin. Wê ev çîrok ji min re şandin, ku ez wan ji aliyê rastnivîsê ve di ber çavan re derbas bikim.  Heya ji min hat, min tenê rastnivîs û estêtîka nivîsandinê guhert û reseniya wan parast.

Ev çîrok li gor naveroka wan bûne sê beş. Çîrokên Zarokan, Çîrokên Mezinan û Çîrokên ku pend û rawêj di wan de hene; tevî ku di her çîrokekê de jî dîsa pend û rawêj derbas dibin.

Di beşê Çîrokên Zarokan de tiştê ku here bêtir bala mirov dikişîne ew e, ku gelek ji van çîrokan li ba gel û neteweyên ewropayî jî peyda dibin. Çîroka here pêşîn ya bi navê FATFATÎLOK gelek dişibihe çîroka gelêrî ya almanî “ASCHENMPUTTEL”, ku ji aliyê Gebrüder Grimm ve hatiye belavkirin. Ev çîrok li ba gelek gelên din jî heye, ku bi navê “SANDRELLA” tê naskirin. Kesê ku çîrokên Gebrüder Grimm xwendibin dê yekser nasbike, ku PÎRA MIROVXWER jî di vê pirtûkê de wek “HÄNSEL UND KRETEL” ya almanî ye. Çîroka ZOZAN Û BOZAN jî, ku li gelek aliyên welatê me heye û bi navê ŞENGÊ Û PENGÊ tê naskirin gelek dişibihe çîroka almanî “Der Wolf und die sieben Geislein”(Gur û heft karik). Tiştê balkêş ew e, ku li herêmên Efrîn heya Amed û Cizîra Botan du karikên bizinê hene, lê li herêma Serhedê û li ba kurdên Qafqasan sê karikên bizinê hene, û ji lew re jî ew dibêjin: ŞENGÊ, PENGÊ Û QULÎÇENGÊ. Wisa tê xuyakirin, ku heya bizin gihîştiye Almaniyayê êdî bûye xwediya heft karikan.