Ew Çavên Belek

Mustefa Reşîd

Gava min dîtin

            Ew çavên belek

Di dil da geş bûn

            Ji gulan gelek

Fil û nesrînan

            Bihin reşandin

Lal û beybûnan

            Bi keyf û henek

Li dorê girtin

            Govend û xelek

Ji ser min hildan

            Ev bar û şelek

Hoy dilo dilo

            Dilê tîntorek

Gava ew kenî

            Min got ezbenî

Min lêv ramûsan

            Ew çeng û enî

Min sed ramûsan

            Ji yarê birin

Ji bin guharan

            Û wî gerdenî

Li ser çoga min

            Rûnişt,  veçenî

Li ser milê min

            Serê xwe danî

Nenî wey nenî

            Cana min nenî

Gava li ber min

            Ew bejna zirav

Bê dîn û îman

            Ez daketim nav

Min bir bi talan

            Ew gewd û hinav

Min bihuştek dît

            Bi bax û sîlav

Ji avên Kewser

            Ember û gulav

Bi gulman vexwar

            Şerbet û xuşav

Hoy dilo dilo

            Dilê di nav dav

Homburg, 04.10.2009

çapkirin