Hêvî

 

Mustefa Reşîd

 

 

Ez perestê Kurdistan im

        Kurdistana bendewar

Jar û mestê niştiman im

        Tev bihuşt e war bi war

Dildarê şax û zozanan

        Her ber û lat û zinar

Wan newal û germiyanan

        Cengel û bax û beyar

Hezkirê Dicle û Ferat im

        Şîp û sîlav û robar

Ew herêmên jê dihatim

        Gişt kulîlk in, gulhenar

Goriyê qada welat im

        Gav bi gav û dar bi dar

Ax welatim, ax welatim

        Aşîkar e, aşîkar

Ew demên tarî diborin

        Pey zivistan tê bihar

 

Ev bihuşta bav û kalan 

        Van neyaran her dixwar

Roj û salan, roj û salan

        Ev neyarê hov û har

Niştiman tev bir bi talan

        Ev welat kir tar û mar

Dil û cerga min bi xwîn e

        Ey neyaro, ey neyar

Kîna dilê min kes nebîne

        Ya sitar û ya sitar

Şêr-pilingên deşt û latan

        Şehsiwar in, şehsiwar

Va ne! hatin, va ne! hatin

        Şadibin gund û bajar

Ax welatim, ax welatim

        Aşîkar e, aşîkar

Ew demên tarî diborin

        Pey zivistan tê bihar 

 

Çêlikên baz û şahînan

        Dil bi kîn in, dil bi kîn

Pişt û basik êdî xurt in

        Tev ji hêlînan firîn

Ref bi ref ew dadihatin

        Bazdide ew jehremar

Qehremanên wan zozanan

        Cengewar in, cengewar

Pehlewanên germiyanan

        Her tivinga wan li bar

Lek bi lek ew pêşve hatin

        Tirs ketî cerga neyar

Bo tivingên wan posat im

        Gav bi gav û car bi car

Ax welatim, ax welatim

        Xweş diyar e, xweş diyar

Ew demên tarî diborin

        Pey zivistan tê bihar

 

Nêrgizên şax û zozanan

        Nû gihane, pişkuvîn

Sorgulên wan germiyanan

        Xemrevîn in, xemrevîn

Bihn û hulma wan pûjanan

        Daketî deşt û pesar

Mar û pûngê her neyar in

        Rev ketî marê teyar

Serbazên Kurdan dihatin

        Şev û rojan ew li kar

Dil bi kîn in, bi şewat in

        Evîndar in, evîndar

Derdixin dervey sînoran

        Ev qirêj û ev gemar

Ax welatim, ax welatim

        Xweş diyar e, xweş diyar

Ew demên tarî diborin

        Pey zivistan tê bihar