MÊRANE RABIN XORTÊN KURDISTAN

Cegerxwîn

Sorgul ji baxê ciwanim weşîn

Bilbil li şaxê umrem dikin şîn

Hêsir ji çavêm xuşîn û meşîn

Çendî bilindim serê min sare

Cobar ji çavêm xweş têne xare

Sih sale deng û qîr û heware

Axîn welatêm zanim tu qîzî

Çibkim ku dijmin bi te dilîzî

Qêrîn dikim ez kes nabihîzî

Zanim tu rindî xweş û ciwanî

Rustem tu xwestî ji bo me anî

Dijmin ji dest me bi zor deranî

Çiqas delalim porim ji zêre

Belê we xwestim nizam ji kê re

Rovî revandim ji destê şêre

Dijmin li ber te destê me digrî

Himbêz dikî xweş , tifû tu bimrî

Namûs nemaye ,bo çi tu digrî

Sonda me şax û kulahê Rustem

Yan em te bigrin , yan tev biçin em

Ji ser xwe rakin derd û kul û xem

Kûrkûr menale em tev biriştin

Qurban metirse va em gihiştin

Yan dê te bigrin , yan bêne kuştin

Sonda me xwîna Seî'd û Qazî

Hetta bi zorê tu min nexwazî

Ez dê binalim hewar û gazî

Eger bi xurtî hûn min bixwazin

Li we bipêçin zendên bi bazin

Dilxoş û bê xem li ser mi razin

Dijmin siware lê bê celew tê

Îdî ji şerma nema me xew tê

Serê wî neşkê qîma me hew tê

Ji bîr ne çûye li ser te digrîn

Ev bû du sed sal em jar û xemgîn

Derdê te kuştin hezar Cegerxwîn

çapkirin