REWŞA WELÊT

 Cegerxwîn

Destê yar bi dest im, çi serxweş û mest im

Di ser me re şax in, di bin me re ave

Şehinşahê dinya taca zêrîn da ser

Rewşa lat û katan xemla zer û tave

Kesk û zer û şîn î li me tevlî hev bûn

Pêt û pêlên jînê dagirtin ew nave

Em mane mestane, hawîr gulîstane

Tev bax û bustane, li me dikin nave

Tenê ez û yar in hawîr me zennar in

Awir xweş dibarin ji wan belek çave

Bi lenc û nazdarî şekir ji ken barî

Biskên reş û tarî bûne bend û dave

Lêv me bir ser lêva sîng baxçeyê sêva

Xwedê me daxêve bê tirs ketim nave

Li hawîr me sorgul kesk û şîn û sunbil

Di ser me re bilbil qîr û lavelave

Me yar kire hembêz dar û ber û parêz

Li govendê bûn rêz bûne bûk û zave

çapkirin