ŞAM ŞEKIRE - WELAT ŞÊRÎNTIRE

 Cegerxwîn

Welatê min tiwî bûka cihanî

Hemî bax û bihişt û mêrg û kanî

Şepal û şeng û şox û naz û gewrî

Gelek şêrîn û rind û pir ciwanî

Serî taca Silaheddînê kurdî

Enî roje di birca asimanî

Du birhên te kevanê Rustemê Zal

Du zulfên te ji tîrên qehremanî

Riwê te agirê Zerdeşt û Mezdik

Ji te hêstir şeraba kamiranî

Du çavên te wekî deryayê Hurmiz

Kepû elmase karê Mûş û Wanî

Du lêvên te kitêba Hacî Qadir

Zimanê te ji benda şêxê Xanî

Çena te gohê Cûd û Şax û Hebler

Qirik eywan û taqa kesrewanî

Di sînga te kitêba Zendewista

Memik ferfûre têde neqşê Manî

Du destên te tixûbên Tirk û Îran

Hero cenge bi tîrên zerveşanî

Ji sînga te bi jêr de gelyê Laleş

Ziyaretgahe bo me her zemanî

Bi nîşan û bi nan û xwîn rijandin

Me dest girt û qelen da û tu anî

Ser û pa zend û bazin tev bi hinne

Hemî sorin ji rengê erxewanî

Bi te em şa nebûn ev bû du sed sal

Ji me dengê tifinga çûye banî

Bira û law û bav û ap û pismam

Li ser te hev dikuştin pehlewanî

Ji Loran ta bi Zaza tev bi xencer

Dihatin hev li meydanê beranî

Bi talan û bi kuştin, hem bi sotin

Me konê şer li ser sînga te danî

Emîr û begler û paşa û axa

Kirin wêran sera û birc û xanî

Li alîkî te deng û ceng û halan

Li alîkî sedayê xewsê sanî

Hemî bûne mirîd û şêx û sofî

Buhiştîne çikin nav û nîşanî

Li axur radizin lê şêx diçî jor

Berî nîvro ji banî tê giranî

Ser û pa tev dikî gulav û ember

Dibê nûre kero ma tu çi zanî ?!

Bi van xapan dixwarin xwarinên xweş

Wekî şêx û melayên vî zemanî

Du derdên me hebûn dijwar û xeddar

Xizanî yek, ewê dî her nezanî

Weke şêr û pilingan em diçûn hev

Penîr rovî ji meydanê hilanî

Me ew rojên ciwanî tev bi der dan

Bi zîvarî, belengazî, şivanî

Herê bûkê pepûkê jar û mestê

Li ser sînga te zava man biyanî

Te reş daye serê xwe ber li ser me

Li te rokê dibî pîroz kitanî

Cegerxwîne kurê te her dinalî

Ji ber jana nezanî û xizanî

çapkirin