SITEM DIMRÎ BI HIKMÊ DEM

 Cegerxwîn

Bese paçik ji guh derxe çi hewar û çi qêrîne

Xwe rapêçe ji bo cengê bi zor heqqê xwe bistîne

Dizî û cirm û bêş û zor, bese millet li te şerme !

Dema tang û firoka ye, çi xişt û def û tizbîne

Bixwîne da tu serbest bî, bi xurtî bighê doza xwe

Binêr her tişt li dinya yê wekî cenga Filestîne

Cîhan bûye du bend îro, ku maldar û belengazin

Di ber hev re şerîpanin ji Çînê ta biçî Çîne

Belengazan serî hildan, sitem îdî qebûl nakin

Ji destê sermeyandaran gelek zor û sitem dîne

Dilovanî digel zorê, her û her ceng û lêdane

Çiya û deşt û av û bej, ji sertîrên sitem xwîne

Cegerxwîn tim dikî qêrîn, sitem dimrî bi hikmê dem

Ji min bawer ke ey millet nebê dîne ne bê dîne

çapkirin