LI BER DERÎ

Mustefa Reşîd

Bi rê ketim çûm nav gula

Derman bikim derd û kula

Bûm bazekî dîlawerî

Da pey kevok û yaşila

                        Kengê bibînim bilbilê

Pir geriyam, roj û şevan

Ketim nava çax û deman

Baskê demê li her cihî

Roj û tîrêj li min birî

                        Kengê ew tav li min hilê

Gava ez çûm ber wî derî

Derket hember min ew perî

Eşq û evîn di min gerî

Min kûr li wan çavan nêrî

Li ten û bejn û paşilê

Kuştim bi wê bejna zirav

Dil û ceger, sîng û hinav

Kenê şêrîn, tijî evîn

Dibû ember, dibû gulav

                        Her livek wê çavên min lê

Dêmê gulî, ew birh û çav

Lêvên şeker, li ser xunav

Min ramûsan ew lêv û dev

Bi sed silav, ez ketme nav

                        Ez têr nebûm ji çavkilê

Li vî berî, li wî serî

Vî hinguvî, wî şekirî

Min geh firot, min geh kirî

Bilbil ji rekehê* firî

Evîndarê dara gulê

*) rekeh = qefes

Homburg, 21.05.2009

çapkirin