Nar Mesûkê Narê (SKÊÇ li ser bingeha straneka folklorî)

Mustefa Reşîd

Çûme nava tanika

Hatî dengê canika

Min dest avêt zendika

                        Nar Mesûkê narê

Çûme nava hejîra

Bû şîngpînga zincîra

Min dest avêt gustîra

                        Nar Mesûkê narê

Çûme nava kizina

Hatî bihna sosina

Min dest avêt bazina

                        Nar Mesûkê narê

Çûme nava bîstana

Bû pîrpîra fîstana

Min dest avêt qeytana

                        Nar Mesûkê narê

Çûme nava sorgula

Hatî dengê pîrpila

Min dest danî ser mila

                        Nar Mesûkê narê

Çûme ber ava çema

Bişkînim kul û xema

Min dest avêt pêrçema

                        Nar Mesûkê narê

Çûme nava zeviya

Yara min dibeziya

Min dest avêt keziya

                        Nar Mesûkê narê

Çûme nava pembiya

Hat min dengê horiya

Min dest avêt guliya

                        Nar Mesûkê narê

Çûme nava zebeşa

Hat dengê gulîşeşa

Min dest avêt menteşa

                        Nar Mesûkê narê

Çûme hafa kendala

Bû xîngxînga xilxala

Min dest avêt tengala

                        Nar Mesûkê narê

Çûme nava beyara

Bû şîngpînga guhara

Min dest avêt henara

                        Nar Mesûkê narê

Rû geş bû mîna hêyva

Min dest danî ser sêva

Min lêv xist şekerlêva

                        Nar Mesûkê narê

Em gihan ber peravê

Li hembera giravê

Min dest pêçan li navê

                        Nar Mesûkê narê

Derxist şûşê gulavê

Berda ser wê hinavê

Em ketin dam û davê

                        Nar Mesûkê narê

Min sîng da ber sedefa

Guh neda gurr û gefa

Min dest avêt ------

                        Nar Mesûkê narê

Homburg, 10.05.2009

çapkirin