Ji bo te Amed

Necib Balay

Ev nivîsa kurt û sade weke pêşekî ji bo xwendina hind helbestan min di konferansa PENa kurd de li Amedê pêşkeş kir bû, ya ku li 21-25 Adarê hatiye sazkirin.

Amed....Diyarbekir

-Ezê hatîm, çend pirsan ji te bikim, bersiveke bêdeng û nihênî ji te dixwazim.....!!!

-Ev pirs sala 1979an min bi helbestekê ji bajarek din kiribûn...Lê ew bajar, her zû şehîd bû, û digotine wî şehîdê mezin ...Helebçe.

-Ev pirs di salên 80an de min ji Sûlêmaniyê, ji Duhok û ji Hewlêrê kiribûn...Lê bersiv bû Kîmiyabaran û Enfal.....

-Ev pirs di salên 90an de min ji Berlîn, Parîs, London û Pragê kiribûn….Lê bersiv bû Koçberî û dûrwelatî.

-Ev pirs li Nîsana 2003an min ji Paytextê Zulm û Zorê kirin…Lê di heman demê de, di heman bîstê de, li meydana Fîrdewis Senem û Peykerên zordariyê têkşikiyan û herftin...û berdêla Enfal û Helebçê bexşî

Amed...Diyarbekir

Ji te dipirsim çend Serhildanên aştiyê, di derazînka te de hatin serbirîn...Ma pêwîste hêjî xwîn biherike...?

çend kevir li ser Kelha te hatin danîn ewqas birîn di laşê te de çêbûne...Ma tu ne êşiyayî.?

çend qurşîn û qalkên gulleyan yên koştiyên faiilê wan nediyar, keftîne ser sîngê te...Ma ah û fîxanên te bi dawî nayên...?

çen Felemerz, Yadû, Biroyê Hiskê Têlî, Pîran û Mezloman, ew siwarên hespên xwe di cergê te de bezandîn....Ma cardî navegerin jiyanê û silav bikin semaya Newroza te...?

çend baxçên gul û çîçekan, Hewdên binefşokan, Latên nêrgizan, bi solên zordariyê û dagîrkirinê hatîne perçiqandin, binpêkirin...Ma cardî serîhilnadin û bêhnê bilav nakin...?

Ev pirse û gelek pirsên din me hene û bersivê jî ji te naxwazîn, çûnkî dizanîn tu ewqas ji êşan giranî, nalîna te destûriya bersivdanê nade, bi tenê em dixwazîn cara dahatî, konferansa dahatî, amade bibîn û bi nexşeyê birayetî aştî û azadî û wekheviyê li ser dîwarên te hatbîte nexşandin û te weke Pêşeng ji bo azadiyê bibînin.

çapkirin