anmeldung

10 Sal û Tewafek din li Lalişê

Necib Balayi

ev nivîse weke pêşekî ji bo xwendina hind Helbestan, min li vegera xwe ya Kurdistanê piştî dûr ketina 10 salan, li baxçê Êketiya Nivîskarên kurd li Duhokê pêşkeş kir.

- Berî 10 salan bi temamî li sala 1994 an , payiza xem û azaran payizeka ta girtî û ne di wext da, mehên nîsan û gulana me dagîrkirin û bohar ji salê dizî..gol û kolîlkên vî baxçey sernixwîn hiştin, darûbarê aqarê vî bajêrî bêxemil kir û rubarê me, bêdengî û bê awaz sernişîv di meşiya..her tiştê bixemil û jêhatî, her geşatî û nûjiyanek.. her kenî û girnijînekê, rengê vê payîza qeda lêketî girt .

- Ez jî weke her bîrû hesteka vî bajêrî, û vê axê, bûme belgekê zer û balindekê çeng weryayî yê vê payîzê..û ketim ber hinga pêlên bayên bê nasname û raqetandim, weke xwe kirim penaberekê bê nasname, yê heroj di ser axekê ra derbas dibe û heroj li welatekî dibe mehvan...car dinav mijo û morana Lendenê re.. car jî li Parîsê di jêr borca Evil re derbas dibin û qesta Diznîland diken li gel zaroyan dikevin gera yarî û henekan.

- Li Prag li gel pêlên rûbarê Viltava xwe di şilikînin û di jêr pira Çarlisî re derbas dibin, li gel parçeyên krîstalê Bohêmiya û mercanên Moraviya di girnijin car jî silav dikine peykerên bajêrê Roma û dibin şahidên dîrokî, car jî di nav raz û nepeniyê bajêrê Amistirdamê de winda dibin, li cadeyên leşfiroşan û li qehbexanan dihên xapandin.

- Car jî li jêr sîbera dêra bîranînan li Berlînê qehwê vedxûn û di tonêlên Broksilê ra xwe varê dikin û biryarên leşkerî û cengan li jêr logoyê NATO yê diden, lê li Genev ê, li jêr korsiya şikestî, korsiya bi sê lingan drûşmên wekhevî û aştiyê bilin diken û daxwaza nemana şer û cengan dikin.

Û car jî li Stokholmê li dîwana nivîskarên kurd dibine berevanên dûberî û kîn û hez jihevdû nekirina wan..car jî li vêrê û wêra he û nizanim sobe jî li kîderê dê dest bi qonaxeka nû ken û ber bi kîderê dene rê...?!

- Berî 10 salan li vî baxçey dengê helbestên zîz û yaxî yên zîndî Selman kovlî dihatin bihîstin, bi peyvên xwe yên pişterê û helbestên ji xonav û rohanên kofî reş û Nêrgizên felîte di weşandin yên gilî û gazinde jê dibarîn.

- Berî 10 salan, li vî baxçey kekê minê hêja Diyarê xoşewîst yê ko me bi hevra ji leşkergehê rijêmê li Şingarê xwe ji rêzbuna serê sibê veddizî û qesta mala Seidûy dikir, Diyarê xemên çiyayekê weke Metînî di cergê xwe da di cemandin û hembez dikirin..

- Berî 10 salan peyvên Mamosta Emînê Osman yên dilgeş û dilşikên mêhvanên vî baxçey bûn û sibera xwe li gol û golzaran dikir.

Berî 10 salan me û vî baxçey, me û vê axê, me û vî bajêrî û van nemiran, me û dayikan, xwîşkan, û malbat û kes û karan bi bêdengî û bêy hezkirin xatir ji yekdu xwast bû.

Berî 10 salan.. li vî bajêrî..li vî baxçey, helbest bêdeng bibû..bi tenê dengê tivengê dihat bihîstin, bi tenê tiveng di peyvî û ..ew desthelatdar bû, ne hesreta helbestên we..ne pehlewanên çîrok û romanên we ne rengên tabloyên we û ne jî ax û awazên Nay û kemana we dikarîn bi ser dengê vê Malkimbaxê da zalbibin û sinorekî bû desthelatdariya wê danin, hetako şahê aştiyê.. elhoyê bilind firînê û kevoka aştiyê şaperên xwe li hindavî vî bajêrî û vê axê lêkdayin û hemî dengên nehez bêdeng kirîn..birayetî, pêşkeftin û azadî barandîn...bila êdî dengê dûberîyê nebihîzîn..dengê neheziyê nehêlîn..nefret li duberiyê û neheziyê, silav li hezkirin û aştiyê.

Hevalino..

Hêjayino..

- Berî 10 salan, li vî bajêrî , bi Fanusê ez li ronahiya rojê digeriyam, vê roja ewqas mezin xwe li me winda kir bû ..

- Berî 10 salan li vî baxçey, min hind peyvên xwe yên xemgîn bi cih hêla bûn.

- Berî 10 salan demê ez çuyim di gel min da bûn hind helbestên serberdayî, yên sinêle û bêhina eşqê jê dihatin, li ser peyvên wan belatînkan dadidan, di nav rêzên wan de nêrgiz şîn dibûn.

- Piştî 10 salan, li vegeryanê hind helbestên xesandî û nerm u bê kêlincî di gel min dane ..bêhina axa welat bîranînên zarokiyê û hesreta xerîbiyê, û xem û azaran jê dihê.

- Hind helbest yên dilovanî jê dibarin, û ji yaxîbûnê westiyayî..hind helbest yên gazindan ji raburiyê xwe diken u naxwazin di postên sansor kirî de tozgirtî bimînin.

- Hind helbest, yên ku di ser merz u toxîban re bi cilên sihrî derbas dibin, û bi tenê nasnameya mirovayetiyê hilgirtîn, u dixwazin seredanekê biben ser gorên bi komel, li Helebçê fathekê bixwînin, li Qoştepe taziya heşt hezar Barzaniyan nûken û li leylan û biyabanên axeka biyanî bermayên enfalkiriyan vecemînin..û rometa pakîze û frîşteyên asmanî, Sitî û Zînên kurd , yên di enfalan de zorî lê hatiye kirin û ji keçînî êxistîn û li bazarên dehman firoşiyê bê rumet hiştîn, bilin ragirin.. peykerên wan li serê her duryanekê weke xudawendên evîn û dilovaniyê bihên peristin.

- Hind helbest yên dixwazin li jêr sîbera çinarên Urmiyê baweşînkê li li giyanê Qasimloy bikin..li Berêgarey tivenga Mehmud Êzidî ji jengê bişun û li geliyê Bênarînkê şonwar û şon solên Weysî Banî bi şopînin.. li Diyarbekrê li Amedê agirê Mezlom û Egîdan xweş bikin, li Dêrsimê peyama Zîlanê bigihînin…li kerkukê û germiyan zengila dergehê dayika mame rîşey lêdin.

- Hind helbest yên dixwazin silav bikine gorên şehîdên 1î şiwatê û li hewlêra holako şikên seredana kelha azadiyê bikin..li Qamîşlo û Efrînê beşdariyê di merasîmên şehîdên bihara 2004 an de bikin.

- Hind helbest yên dixwazin li bajêrê Neynewa , bajêrê ji dîrokê hatiye dizîn û ji bajêrvaniyê hatiiye şoştin li zîndana babil-cedîd kinifê wê sêdarê bibînin yê ku hevalê minê xebata jêrzemîn Tahir Tahir û 9 endamên rêkxistina pêşkeftin li sala 1980ê li sêdarê dayin û şehîd kirîn.

- Hind helbest yên cudahiyê di êxine di navbera bêbextî û qederê de, di navbera rastî û nerastiyê de, di navbera şer û aştiyê de, hind helbest yên ku dibine herêmeka cuda û bêlayen di navbera Beheşt û Cehnemê de, dibin givande di navbera rengê reş û spî de.

- Hin helbest ku dibine zêrevanên peravên derya û Oqyanosan yên penaberên welatê min ji şoka qaçaxçî û bazirganên mirovan rizgar dikin. Belê hêjayino..hevalino..hind helbest .. hind hesret.. hind gazinde..hind kenî û girî û silav û milav û nizanim çi dî, min bi xwe re anîne.. fermon hûn û çend helbestên ne helbest.

çapkirin