anmeldung

SÊKUÇA AŞTIYÊ

Nîzamettin Akkurt

Hevdîtinên Abdullah Gul û şanda pê re li welatên mînanî Ûrdûn, Îsraîl û Filistînê pêk hatin. şanda ku derkete riya aştiyê û gelek hevdîtin pêk anîn, bi taybet ji aliyê Filistînan de gelek bi qedir û qiymet hatine pêşwazîkirin. Helbet mirov dikare vê yekê watedar bibîne û Filistînî mafdar in ku şabûne, ji ber ku di nasîna dewleta wan de yê ku yekem mora xwe lê xistibû Tirkiye bi xwe bû. Bi gumana min ev alî rexneyê naxwo.
Di hevdîtin û ragihandinên karbidestên Tirk de, xala ku herî zêde derdikeve pêş anîna aştiyê ye ji bo Rojhilata Navîn e. Bi taybetî axaftina A. Gul di roja 5’ê vê heyvê de vê yekê eşkere danî holê.
Helwesta ku aşitiyê ji bo kêşeya di navbera Îsraîil û Filistînê de ferz dibîne, helwesteka erênî û baş e.
Ez bi xwe tê de nabînim ku aliyekî rexne bixwo hebe. şerê êdî ku hatiye halê amrazekî bêwate li benda aştiyê ye û di halê hazir de desteka ji dewletên dîtir bê, dê karibe tevkariyeka mezin bide çêkirin. Ji ber ku şer û pevçûn û bi taybet jî nakokiyên ku navendên Rojhilata Navîn de dertetine holê û hê jî bi hêza xwe ya hundirîn nebûne xwedî çareserî, bi pêşveçûna xwe re divêtiyeka mezin dertînin holê, ji bo destek û tevkariya derveyîn.
Rûxandîna rejîmên dîktatoriyal ên Rojhilata Navîn di kesayeta rejîma Ireqê ya Saddam de yekem numûneya baştirîn e ku em dikarin bidin. Hizr û bîra min ew e ku destwerdana derveyîn nebûyana, yek jî ez vê weke destek û tevkariyê dihesibînim, ne gengaz bû ku rejîma heyî were rakirin ji hêla hêzên herêmê yên hundirîn. em qebûl bikin û nekin îro di hundirê Iraqê de guhertinên cidî û rişt pêk tên. Di jiyana civakî de û bi taybet jî di navbera komên civakê de têperandina kevneperestiya berê di radeyeka mezin de ye. mirov dikare ve yekê di her wêneyekê jiyanê de bibîne.
Vêca rewşa neha ya herêmê bi rastî jî ji her alî ve bendewariya aştiyê dike. kêşeya Îsraîl û Filistin, kêşeya kêm netew û olên herêmê, di pêş de jî ya kurd li benda aştiyê ne.
Û li kîjan deverî û di kîjan kêşeyê de aştî gavek biavêje, dê di heman demê de tesîr û bandorê bide kêşeyên dîtir. Tirkiye bixwaze û nexwaze jî dê ev yek tesîrê bide anîna aştiya ji bo kurdan.
Jixwe her wekî ku Tirkiye zendên xwe ji bo aştiyê badaye, dikare vê yekê bike destpêka kêşeya tirsa xwe ya herî mezin.
Li Başûrê Kurdistanê ger ji ber desteka ev çend salan a Tirkan be û ger ya destwerdana vê dawiyê li ser Iraqê be rewşa pêkhatina dewletekê derketiye holê. hê jî ev aktîf destekdayîn ji gelek milan ve pêk tê. Dê ev yek ji gelek aliyan ve wergiriya xwe fireh bike. Ev halê peresanê bi xwe ye. Tesîr û bandora ku pêk tîne, bi xwe ve sînordar namîne.
Jixwe hin derdor di aliyê aktîf destekdayînê de gotûbêjan dikin. Heger ev yek hinek hêz nîşan bide, dikare bingehê tifaqeka mezin pêk bîne, bi taybet di nava hêzên kurdan de. Gelek hêzên kurd vê yekê di gelşa hilbijartinan de nîşan dan. Helbet di serî de Kongra Gel û pê re jî gelek derdorên din, jixwe gotûbêj jî hene, dê xwe ji vê yekê nedine paş.
Di heftiya bê de Tirkiye, DYA û Iraq di navbera we de dest bi civînan dikin. Tê zanîn ev civîn li ser kêşeya kurd pêk tê. çendî ku pêşveçûna dewleta kurd a herêmî weke mijarekê bigire nava xwe jî, xala yekem ku Tirkiye dixwaze bixe rojevê, Tevgera Azadiya Kurd e. Dê Tirkiye hemû kartên xwe deyne ser masê, çendî ku hevsengên herêmê li gorî kartên wî nayên jî, di ya xwe de israrkirin, gengaz e ku bibe helwesta sereke.
Lê belê ev yek jî pir zelal e. Helwesta kevin ti gavî nikare bi Tirkiyê bide avêtin, bi taybet jî di vê pêvajoya ku mûzakere dest pê kirine ji bo Yekîtiya Ewropa. Rewşa hêz û dînamîkên herêmê jî dest nadin ji bo vê yekê.
A baş, Tirkiye dikare heman rola ku di anîna aştiya kêşeya Îsraîl û Filistîne de dixwaze bileyize, di vê civîna sêkûçe de jî bileyize. Nexwe weke ku bilev dikin anîna aştiyê ji bo Rojhilata Navîn dê bibe xeyalek mezin ji bo Hikûmeta AKP’yê.

çapkirin