NAME

Nusret Kurt

Ez, dîsan di ser porê te re

            Rojê dioxirînim pişta çiyan

Rojeke din xwe diqedîne bêyî te.

Temeneke din kêm dibe

            Ji giyana min.

Ez hîna di dêlindêzên êvarê de

            Bi hewişên veşartî

                        Te bi bîr tînim.

Ez dixwazim bi kenê te

            Hesretan bişkînim

Bi hevokên evînî

            Helbestan bihûnim

Bi bêhna çiyan

            Nameyan birêsînim.

Bêyî peyv bedewiya kenê te

                        Bipesnînim.

Tevlî parçeyek dil

            Ji te re bişînim.

Ez dîsan li pêş awirên te

            Asoyan tune dikim

                        Li ber tariyên êvara

Careke din pêlên bayê başur

            Beyî te hinava min dicemidîne

Dilopek xwîna din diqerise

            Li nav rihên min.

Weke fêrbûyîneke tahm xweş

            Dêlindêz xwe dubare dike.

Ez dixwazim bi awirên te

            Dûrbiyanan biqetînim

Bi peyvên hezkirinî

            Destanan li hev bînim.

Bi tahma biharan rêze nivîsan

                        Binexşînim.

Bêyî gotin

            Bedewiya çavên te bipesnînim

Di kevala dil de

            Ji te re biweşînim.

Hîv nû dibe kevan

Hîna pak in asîman

Ez li benda hilavêtina te me stêra min

Dê zû bike

            Lez ramuse çavên min

Hesretan bişkîne

Dûrbûyînan biqetîne

Da ku di tariya êvaran de

            Bi tîpen ji rengê te (zêrîn)

            Di paytexta dil de

                        Te binivisînim.

Bikim name û ji te re

                        Bişînim.

çapkirin