anmeldung

KA YEKBÛNA KURDAN

Ozcan Kaplan

Kurd di pêvajoyeke girîng re derbas dibin. Li Başurê Kurdistanê van rojên dawî hindek bûyerên nexweş diqewimin. Di navbera PDK û YNK de dîsa nakokî û alozî xwe nîşan didin. Çawa di dîroka Kurdistanê de pirsgirêkên her car xwe dubare dikir îro dîsa derdikevin pêşberî me.

Şerê êşîrî û şerê navxweyî...

Weke hûn jî dizanin Kurd ji hev re jîr in, lê ji der ve re xulam û êxsîr in!... Ev rastiya Kurdan ji aliyê zanyarî ve jî hatiye pejirandin. Ji bo Kurdan wiha tê gotin, "Dema du Kurd bigêhîjin cem hev şerê hev dikin", "Kurd bi hev re xayinin".hwd. Çima her kes van gotinan bi kar tîne?

Belê ev çend sale tevgerên Kurdan li Başurê Kurdistanê tekoşînê didin, gelek destkeftiyên girîng bi dest xistine. Di rewşeke federalî de Kurdên Başur di rewşeke nîv azad de dijîn. Taybetî piştî hilbijartinên Iraqê herêma Kurdistanê serxwebûnekê dijî. Lê belê derketina nakokiyên di navbera PDK û YNK de rewşên siyasî bêhevseng dikin. Di demeke wisa de yekbûna Kurdan bi parçebûnê re rû bi rû ye.

Serokê PDK Mesut Berzanî dixwaze Seroktiya herêma Kurdistanê bike. Ji xwe re alîkaran jî naxwaze. Hindek kes dibêjin ku Barzanî 36 sal in di herêma Kurdistanê de desthilatdarî dixwaze. Daxwazeke bi vî rengî ne Telebanî qebûl dike ne jî endamên YNKê qebûl dikin.

Niha Celal Telebanî Serokdevletê Iraqê ye. Piştê 6 mehan şun ne dema wî bi dawî dibe. Lê li beramberî vê yekê Mesud Barzanî dixwaze bibe serokê demdirêj ê herêma Kurdistanê. Ji ber vê sedemê nakokî her ku diçin kûr dibin.

Êdî gelê Başurê Kurdistanê ji rêxistînên Kurdan bawer nake. Gelek kes dibêjin siyaset "fişe ye". di navbera rêxistinên Kurdên Başur de Sedemên wiha gel dibe bêbawer bûnê. Em dema ku di kolanên Başurê Kurdistanê de bigerin, gelek kes êdî şerê birakujî û alozî naxwaze. Bi rêya hilbijartinê re hikûmeteke demokratîk dixwazin. Pêwîste rêxistinên Kurdan hewldanên aştiyane û demokratîk bi pêş bixînin û pêwîste êşîrtî û malbatgerî bidin aliyekî.

Çi rêxistin dibe bila bibe, dema ku bawerî nedabe gelê xwe ev tu car bi ser nakeve. Bila Birêz Barzanî û Telebanî jî li ser vê rastiyê hişyar bin ku kêngê di dil û mejî de bi gelê xwe re bibin yek û ji bîryarên gel re rêzdar bin dê wê demê bi serbikevin. Pêvçûn û alozî ne li feydeya me Kurdan e.

Pêwîste çanda demokrasiyê bi pêş bikeve. Rêxistinên Kurdistanê tev bigêhijin gel hev û hêzên xwe bikin yek û yekbûna Kurdan çêbikin.

çapkirin