Ozcan KAPLAN

MAMOSTE Û PERWERDEYA NÛJEN

Ji vebûna dibistanan re demekî kurt maye. Mamoste û xwendevan hêdî hêdî ji bo perwerdeya sala nû amadekariyên xwe dikin. Lê belê beriya ku dibistan vebibe, dixwazim çend gotinan bêjim.

Li Wargeha Mexmûr’ê, di dibistanên me de asta perwerdê mijara giftogûyê ye. Lê belê beriya her tiştê mijara herî girîng rewşa mamosteyan e. Di destpêka penabertiyê de mamosteyên ku di perwerdê de xebat kirine ji wan tu kesê berê mamostetî nekirin e. Ji bo zarokan perwerde bikin, kesên ku li deverên dîtir xwendibûn, bi dilxwazî bûne mamoste. Ji ber ku wê demê derfetên mamoste ji devre anînê qet tune bûn. Bi vî awayî mamosteyên ku ev 12 salin xebatên perwerdê bi rêve birine ji bo xwendekaran xebateke piroz kirin e. Her wiha di van 12 salan de her mamoste ji aliyê pîşeyî û pisporbûnê ve encamên girîng derxistin holê. Di van salên dawiyê de hem derfetên pêşxistina perwerdê derketin holê, hem jî ji aliyên pisporbûna mamosteyan ve ezmûneke girîng hatiye destxistin. Ji ber vê yekê divê êdi ji vir û şûn ve ji bo xebatên perwerdê mamosteyên nû bên girtin û di ezmûnan re werin derbazkirin. Her wiha ji bo mamosteyên nû werin girtin, pêwîste ku li pêşiya wan hinek pîvanên nû bêne danîn. Jixwe di sala 2005’an de konferansa perwerdê û mamosteyan hatibû lidarxistin, di derbarê mamosteyên nû de biryarên bi vî rengî hatine girtin. Di nava van bîryaran de a herî girîng û balkêş; divê mamosteyên nû bên girtin, xwedî dîploma bin. An jî herî kêm amadeyî xwendibin.

Di van salên dawiyê de gelek derfetên girîng derketin holê. Lê belê, her ku derfet zêde dibin, ji aliyê xurtkirin û pêşxistina pîşeyê de sistbûn û kêmayî derdikevin holê. Xala herî balkêş jî her mamoste li ser vê mijarê ketine nava lihevhatineke zimnî. Di pêşxistin û xurtkirina perwerdê de gavên berçav nehatine avêtin. (Weke tê dizanîn piştî hilweşandina sîstema Baas, li Iraqê û Başûrê Kurdistan’ê jiyan ji gelek aliyan ve xirab bû. Bêguman ev xirabûn li Wargeha me jî bandor kir.) Mixabin, li gor pîvana perwerdeya nûjen lêkolineke berfireh hêjî pêknehatiye. Divê ji bo di pêşxistina perwerde û amadekirina pirtûkên waneyan de ji derveyî mamosteyan, komeke taybet were amadekirin. Pewîste ku ev kom di derbarê mijarên perwerdê de pisporbin, li gor pêdiviyên nû afrînerbin.

Em dema ku asta mamoste û perwerdeya li Wargeha Maxmûrê dinirxînin, li gor pîvana perwerdeya cîhanî, gelek lewaztir dibînin. Divê ku li gel hinekan ev rewş normal e. Lê dema ku em bikevin kûraniya wê, hînbûyinên bi salane hatine rûnişkandin, dihêle ku li ser perwerdeya nûjen û pêşketî ser êşandin zêde pêşnekeve. Bi vî rengî jî asta me li gor perwerdeya Cihanê lewaztir dimîne.

Lewra çi dibe bila bibe, pêwîste ku her mamosteyê me vê rewşa xeter biguhurînin. Gengaze ku barê me hinek giran e, lê belê avakirina civakekî pêşketî li ser milê mamosteyên me dimeşe.

çapkirin