Îslam û Pîrozî  

Pîr RUSTEM

     Çima ramyariya Îslamî nikare ji dîroka berî (1500) sal derkeve, û çi dihêle ku, mirovê Misliman û di her tiştê xwe de bawkiya ewên pêşî bike. Ango, çi dihêle ku, ew ji dîroka îro bireve û bizavên xwe bike ku, li gor rabûn û rûniştinên dema “Pêximber”, û jiyana wê çaxê bijî. ? eger ku, karibe dê zorê li “Yê Din” jî bike, da ku, ew jî li gor wê dema berê jiyana xwe nîgar bike.

     Li gor dîtina me, bersiva pirsên çûne di gotin û têgihêştina “Pîroziyê” de ne; Ewa ku hêştiye deqa Quran ê, û piştî şikandina pûtên hundir Kaibê, bi xwe bibe pût û li pêşiya her guherîn û pêşketineke nuh bibe kelem, û rê li ber her zîrekiyekê bigre ku, ew di herî û kevza wê golê de bîte fetisandin.

     Bi gotineke din; Eger ku, tu banekî ji xwe re deyne, dê tu yê nikaribî ezmên bibînî. ? mixabin deqa Quran ê, ji fikir û ramyariya Îslamê re, banê Herî bilinde, û gihîştî pileya ku, em wê weke jêdera her zanyariyekê, afrandinekê bibînin.

     Ango û li gor ramyariya Îslamê, ew; Deqa Quran ê jêdera evê zanyariya me ya îro ye, û her afrandin û pêşketinên di hemû waran de, ji wê deqê hatine wergirtin, û wilo ew gihêştine ewê baweriya ku, dibêje: Xweda bi her tiştî dizane û wî ew zanyariya xwe xistiye hundirê wê deqê, û tiştê ji me tête xwestin ku, em wê şîfrê vekin. ? wilo ew evqas çalakî û bizavên mejiyê zanyariyê ku, ji sedê salan de li Ewropa dest pêkirî ji bîr dikin, û hemû berhemên wê li piş guhê xwe dihêlin.

     Mêjiyekî ji va ton-rengî ku, her tiştî di “Pûtê” xwe de dibîne. Ango, her tişt ji wî re amedeye, û Xwedê ji pêşî de hemî zanyarî xistiye wê deqê, û bi ser de jî evên din; Ewropî ji me re kirine kole û xizmekar ku, ew mejiyê xwe biwestînin û bi şevûroj çalakiyên xwe bikin ku, afrandin û têknolociya nuh bi pêşxînin, da ku, ew têxin raja me muslimanan. Helbet kesên ku, ev baweriya wan be, dê ti carî mejiyê xwe newestîne ku, ew jî bibe xwedî fikir û zanyariya nuh, û emê “Efsana Gilgamiş” weke rasteqîneke dîrokî bibînin.

Cindirês - 2003