Rêzdar endamên komîta rêvebir a “Navenda Celadet Bedirxan ya çandî”.

Nivîskar û mêvanên hêja.

Rêz û silavên me ji we re.

     Bi bihîstina evê nûçeya we re hêviyên me, careke din, geşbûna ku hîne hin kes hene ku raman û rewşenbîrî cihekî bi nirx li cem wan digre û ew dikarin hinekî ji demên xwe bidin evan çêrokan û ji bo wan bixebitin. Tevî ku hûn tev dizanin; Her ku kulêreke di ezmanê tariyê de vedibe û baxeke tîrêjan jê diherike, ew bi xwe re gorepaneke jiyanê di afrîne û hêza reşiyê sistir dibe, hêviyan jî paşerojeke sipîtir di dilê mirov de derdike. Vêca em bi hêvîne ku ev navenda we li gor xwestek û baweriyên miletê me be û ne tenê em navekî nuh hildin û piştî şeş mehan ewî navî ji bîr bikin.

     Dost û hogirên hêja. Helbet ev karê we yê pîroz ne yê pênûs û dê ne yê paşin be jî, lê hêvî ewe ku ev xebata we weke kevirê koşan be di avakirina avahiyeke bilind ji bo çend û wêjeyê Kurd û di vê helkeftê de em dixwezin, û bi kurtî, bizava Koma Xanî bînin zimên.

     Koma Xanî ya çand û wêjeya Kurd, û di şevbuhêrkeke ku li bajarê Heleb ê çêbibû, ji aliyê helbestvan Mihemed Hemo ve pêşinyarkirin û roja (14) ya avdarê (1988) an weke dîroka damezrandina komê hate pejirandin û di rûniştina pêşîn de, ku di destpêka meha nîsanê de bû, rola koma Armanc û mozîk û hunerê balkêş û beloq bû.

     Evê komê û bi karînên xwe yên nizim karîbû û di demeke kurt de, li gor bizav û karînên sazûmanên miletên serdest, pir karên giranbuha bi dest bixe tevî ku ji wê bêtir jî jê dihate xwestin, lê mixabin pir hokerên bed, çi ji hundir komê an jî yên derve, di pêşiya wê de dibûn kelem û baskên wê dişkandin lê tevî evê yekê jî wê karîbû evan destkewtan bi cih bîne.

    1- Damezrandina mihrecana helbesta Kurd li Sûriyê ku hersal û di roja bîranîna mirina helbestvanê gewre seydayê Cîgerxwîn, ku rastî (22) yê çêriya pêşîn tê, bike roja helbesta Kurd li Sûriyê.

    2- Pêşbezîna çêrok û helbestê; Komê karîbû sê pêşbezînên helbestê û dudu jî yên çêrokan li darxe û yên pêşî xelatke.

    3- Gelek simîner û şevbuhêrkên çêrok û helbest û mozîkê li darxistin û belkî ew carên pêşîn bû ku karîbû guhdana cemawerekî fireh ber bi evan çêrokan ve bikşîne.

    4- Pêşkêşkirina hin navan ku di roja îro de wan cihekî xwe yê taybet di nav koma nivîskarên Kurd de girtî.

     Bi gelemperî yek dikare bibêje ku koma Xanî, û bi karînên xwe yên nizim û di demeke kurt de, karîbû gerdeka rewşenbîriyê bilivanda û bal û baweriya pir camêran ber bi wêje û çanda Kurd de bikişanda.

Beşdarên xoşewîst.. .

     Me xwest em evê bizava koma Xanî bînin zimên da ku em baş nasbikin ku rola dezgeh û sazûmanên di jiyana miletan de û nemaze yên bindest heya bi kîjan pileyê pêwîste û ew dikarê çiqasî raja wî miletî bike. Tevî ku bizava komê pir nizim bû, û ev bû demeke ku wê karên xwe rawestandiye jî, lê karîbû di van çend salan de gavên girîng û li pêş bavêje, lewre û dema ku me ev nûçeya we bo damezrandina “Navenda Celadet Bedirxan ya çandî” bihîst em bêtir dilşa bûn ku hevalên me pir dibin û emê karibin destên xwe têxin ên hev da ku aso û paşerojeke ronîtir, û bi hev re, em karibin nîgar bikin.

     Mêvanên hêja û xoşewîst.. Belkî û nemaze li gor rewşa îro yek bixweze em tev karên xwe bikin yek û tenê dezgehekê ava bikin. Lê gor bîr û baweriyên me û li gor heyam û hokerên îro, eger ku çiqas kom û navendên me pir bibin dê sûdetir be.

     Di dawiya evê gotina xwe de bi navê Koma Xanî ya çand û wêjeya Kurd em pîrozbahiya kar û xebatên we dikin ku we karîbû, û di rewşeke wilo reş de, bi wêrekî ev kar hilda ser milên xwe. Careke din kar û xebata we pîroz be û hêvî ewe ku ev kar bête berdewamkirin û sipas ji hemû endam û rewşenbîrên ku rêvebiriya evî karî dikin û ji hemû mêvan û nivîskarên beşdar re jî rêz û silavên me.

Cindirês

10. 12. 2000