Pîre û Lûye

Qasimlo Gimgim

Beno nêbeno, Pîrê û bizê de xo ya kole bena. Pîre herroj şitê bize doşena û xo rê kena katix wena. Rojê Pîre reyna şitê biza xo ya kole doşena, ana kûlînde de nana ro. Şona hînî ke awe bîyaro. Hînî ra cêrena ya ke çi bivîno; şito ke dito kulînde de cayê xo de çîno. Çimî Pîre sera benê tarî. Nêzanena ke se bikero…

Rojê heme qeyde, dide heme qeyde, hîrê, çar herroj herroj şitê Pîre werte ra beno vîndî. Pîre vinena ke çare çîno, xo bi xo fendê kena ke dizdê şitê xo pê bicêro. Coka darîya xo kena tûj û pê çiverî de vindena...

Lûye zê herrojî êna kûna kûlînde, şito ke Pîre biza kole ra dito şimena û pêyde cêrena ya. Seke çiver ra vecîna, Pîre xaftla pê çiverî ra vecîna û hebi darîya destê xo dimoçikê lûye xirpo birnena. Lûya ke xafilqeda êna guretene, cerena Pîre vera ke dimoçikê xo cira bicero. Verê xo dana pîre û hebi vengê de veşayî vana;

-Pîrê Pirê! Min kerd to meke, sebeno dimoçikê mi bide mi, ez şorî wertê hevalanê xo de bicêrî...

Pîre vana;

-To şo şitê mi bîya!

Lûye qaytkena ke çare çîno, Pîre dimoçikî nêdana. Vilê xo kena çewt û şona lewê bize, vana;

-Bizê, bizê! Taye şit bide mi, ez berî bidî Pîre, Pîre dimoçikê mi, bido ez xorakî şorî wertê hevalanê xo de bireqesî-bıteqesi...

Bize vana;

-To şo mi rê koçên bîya!

Lûye seba koçeni kuna raye şona lewê dare û vana;

-Darê, darê! Koçên bide mi, ez berî bidî bize, bize şit bido mi, ez berî bidî Pîre, Pîre ra dimoçikê xo bicerî şorî wertê hevalanê xo de bireqesî-biteqesî...

Dare vana;

-To şo mi rê awe bîya!

Lûye bêçare seba awe dana piro şona lewê hînî û vana;

-Hînî, Hînî! Awe bide mi, ez berî bidî dare, dare koçên bido mi, ez berî bidî bize, bize şit bido mi, ez berî bidî Pîre, Pîre dimoçikê mi bido mi, ez xorakî şorî wertê hevalanê xo de bireqesî-biteqesî...

Hînî vano;

-To şo çêna paşay ra vace bêro mi sera bireqesiyo!

Lûye nafa jî kûna raye şona lewê çêna paşay û vana;

-Çêna Paşay, çêna paşay! Bê hînî sera bireqesîye, hînî axwe bido mi, ez berî bidî dare, dare koçên bido mi, ez berî bidî bize, bize şit bido mi, ez berî bidî Pîre, Pîre dimoçikê mi bido mi, bicerî şorî wertê hevalanê xo de bireqesî-biteqesî...

Çêna Paşay vana;

-To şo mi rê citê sola bîya!

Lûye lez kûna raye şona lewê solevanî û vana;

-Solevan, solevan! Citê sola bide mi, ez berî bidî çêna Paşay, Çêna Paşay bêro hînî sera bireqesîyo, hînî axwe bido mi, ez berî bidî dare, dare koçên bido mi, ez berî bidî bize, bize şit bido mi, ez berî bidî Pîre, Pîre dimoçikê mi bido mi, ez xo rê şorî wertê hevalanê xo de bireqesî-biteqesî...

Solevan vano;

-Şo mi rê haka bîya!

Lûye qefelyayî ye tew cayê xo de nêvindena hebi gamanê tezika şona lewê kerge û vana;

-Kergê, Kergê! Haka bide mi, ez berî bidi solevanî, solevan citê sola bido mi, ez berî bidî Çêna Paşay, Çêna Paşay bêro hînî sera bireqesîyo, hînî awe bido mi, ez berî bidî dare, dare koçên bido mi, ez berî bidî bize, bize şit bido mi, ez berî bidî Pîre, Pîre dimoçikê mi bido mi, ez şorî wertê hevalanê xo de bireqesî-biteqesî...

Kerge vana;

-Şo mi rê qût bîya.

Lûye qet bîna xo nêcena şona lewê xize, vana;

-Xizê, Xizê! Taye qût bide mi, ez berî bidî kerge, kerge haka bido mi, ez berî bidî solevanî, solevan citê sola bido mi, ez berî bidî çena paşay, çena paşay bêro hînî sera bireqesîyo, hînî axwe bido mi, ez berî bidî dare, dare koçên bido mi, ez berî bidî bize, bize şit bido mi, ez berî bidî Pîre, Pîre dimoçikê mi bido mi, ez şorî wertê hevalanê xode bireqesî-biteqesî...

Xize vana;

-Şo taye rixe bîya mi sûyax ke!

Lûye bêçare şona lewê gay, vana;

-Gawo, gawo! Taye rixe bide mi, ez berî xize sûyaxkî, xize qût bido mi, ez berî bidî kerge, kerge haka bido mi, ez berî bidî solevanî, solevan citê sola bido mi, ez berî bidî çêna paşay, çêna paşay bêro hînî sera bireqesîyo, hînî awe bido mi, ez berî bidî dare, dare koçên bido mi, ez berî bidî bize, bize şit bido mi, ez berî bidî Pîre, Pîre dimoçikê mi bido mi, ez şorî wertê hevalanê xo di bireqesî-biteqesî...

Ga vano;

-Mi taye mişone de biçarne!

Lûye gay mişone de çarnena, ga rixe dano ci, rixe cêna bena pê xize sûyax kena, xize qût dana ci, qûtî cêna bena dana kerge, kerge haka dana ci, haka cêna bena dana solevanî, solevan citê sola dano ci, sola cêna bena dana çena paşay, çêna paşay êna hînî sera reqesîna-teqesîna, hînî awe dano ci, cêna bena dana dare, dare koçên dana ci, koçên cêna bena dana bize, bize şit dana ci, cêna bena dana Pîre, Pire ra dimoçikê xo cêna ke çi bîvîno, Pîre dimoçik pê morekanê reng bi renga xemelno. Hebi kêfo eşqê de girs dimoçikê xo kena xora û şona wertê hevalanê xo. Hevalî vînenê ke dimoçikê Lûya hawt fend e, pê morekanê reng bi renga xemelîyayîyo. Cira vanê;

-Lûya hawt fend e! No dimoçikê to se nîya bî rindek?..

Lûye vana;

-Mi şî xo da golê ûjay ra, bado dimoçikê mi nîya bî.

Naye sera lûyê bînî jî şonê xo danê golera ke dimoçikê dîna jî bibo zêy ê Lûya hawtfend e. Lê gol xorî beno, lûyê ke xo danê gole ra kunê bine awe û xeneqînê. Lûya hawt fend e jî qaytê ci bena û hwîna...

Na qeyde lûye qewmê xo rê xayinîye kena, wayîrê kerga jî kêf kenê!!!.....

Şanika lûye; herem Gimgim; berhevkar Qasimlo Gimgim

çapkirin