Lolo...Lêlê

                                                           

                                                                    Rezoyê Osê

 

                                       -1-

 

   Berî ko globalîzm bikeve çerxa xwe de,her tiştê  awarte,di terazûya

hevalbendiyê de,normal dihate daneqebûlkirin.Lê,nayê wê radeyê,ko dawî ji

awartedariyê  re nîne  û  xêr û guneh,di dîroka mirovaniyê de,

hemkûfî hev in.

   Belê,di bûyereke siyasî de,dema gundiyan,li gundê Elî-Fero,berxwedan

di ber bidestxistina mafên cotkariya xwe de kirin,rêxistinên siyasî hemberî

axayê gund rabûn û hevalbendiya cotkaran kirin.Lê,axê hewara xwe gihande

hevalbendên xw.Hevalbendên axê bi tank û topan piştgîriya

wî kirin û gundiyên birîndar avêtin zîndanên xwe.Hinga hevalbendên cotkaran,ji

bêçareyî,destên xwe di ber xwe re berdan û gotin:" Zor zane...!".

   Wilo jî,dema gundiyan,li Tilşiîra Aşîtan,berxwedan di ber bidestxistina

mafên niştewariya xwe de kirin,axayê gund hemberî rêxistinên siyasî rabû û

hevalbendiya cotkarên xwe kir.Lê,xwediyê tank û topan hewara xwe gihandin

hevalbendên xwe.Rêxistinên siyasî ev hewar pejirandin û piştgîriya hevalbendên

nû kirin,da gundiyan ji ax û ava wan dûr bikin.Hinga hevalbendê cotkaran,ji

bêçareyî,destên xwe di ber xwe re berdan û got:"Zêr zane...!".

                                                -2-

 

   Dema berjewendiyên globalîzmê dikevin bin baskên nijadperest û

serhişkan de,boşelan radibin,pêl leme-lemê dikin,bahoz û bablîsok xakê

rêj dikin.Hinga awartedarê qels û xizan  dibe,cih ji xwe re nabîne û jan

xwe diberde mêjiyê hestû.Êdî,sitemkarî nayê perdekirin û kujtardarî nayê

veşartin.Wilo,dadgehî ji azmanan dadikeve xwar,cilik ji bin lingên gunehkaran

tê kişandin û zarokên Xatûn û Cêriyan namînin.Ango,dibe

Mihdî-zeman û gur bi mihê re diçêre........

   Li min negirin!.Ez nema karim bi zelalî bihizirim û ramanên xwe,bi rewanî,bi

dar ve bikim.Bi kurtî,mejiyê min ji kêfan re hildiperike,li hev dikeve û weke

girara rijî hev nagire.Belê,nûçe dibêjin,va SEDDAM

HUSÊN hate girtin....Erê,ez nema zanim çi bêjim!.Tenha ez dizanim,ko

kujwerê Kurdan,kujwerê miletên Iraqê û neyarê mirovaniya bêguneh hate girtin...

   Bêgoman,Georg W.Bosh jî weke min,eger ji min ne bêtir ,wê bi kêf be.

Lê,wê ew jî nizanibe,di kêlîkên nêzîk de,peyvên xwe çawa bi dar ve

bike...Hêde,vê nûçeyê çîvanokeke gelêrî di bîra min anî....

 

                                              -3-

 

   Çîvanok dibêje,ko rojekê şeytên xwe kire hevalrêyê rêwiyekî gundî û

xwest feneke mirovane lê bike.Gote yê rêwî:"Em ji vê meşê westan.Were

em,bi dorê,li koklîka hev siwar bibin...!".Yê rêwî ev pêşniyar pejirand.

Wilo,li hev kirin,ko her yek ji wan qederê stiranekê li koklîka hevalrêyê

xwe siwar bibe.Belê,şeytên dora pêşî da yê gundî.

   Piştî yê gundî li koklîka şeytên siwar hat û lingên xwe di ser milan re, ber

bi jêr de, berdan,li xweşiya wî hat.Hinga dest bi stirana xwe kir,got:

"Lo lo...lol lolo...de lo lo...de lolo lolo......".

   Yê gundî,bi vê xwînsariyê stirana xwe berdewam kir.şeytan westa,bihn

lê teng bû û xwe nema girt,got:" Birako,ka stirana te bi dawî nehat!!".Yê

gundî lê vegerand,got:"Ev lolo ye,hîna lêlê bi şûn de ye!".

 

                                                                               

                                                    Qamişlo

                                                                               

                                                    Yekşem

                                                                               

                                                  14.12.2003