Ricardo Gustavo Espeja: „Şopên çewsandina kesên din!”

Birêz Ricardo Gustavo ESPEJA lêkolînelerekî Argentînayê ye. Ev ciwamêr li bajarê Córdoba dijî û bi pirsên dînî û ramangîrî ve mijûl dibe. Ji nav babetên, ku ew dinirxîne, ez dikarim hinekan bi nav bikim: hezkirina nihênî ya bawermendan, Êzdatî, ola Kakeyan, dîn û wêje. Piştî ku me daxuyaniya Navenda PENa Kurd li ser bûyerên dawî (ango destpêka meha Adara 2004an) jêre shand, birêz Espeja hem daxuyaniya me gihande Komela Dêrên Cîhanê (World Church Council), hem jî dîtinên xwe ji PENa Kurd re eşkere kirin. Fermo nameya Espeja bixwînin. Têde hûnê rastî hizirên dostekî me Kurdan û dildarekî kûraya jiyana dînî bibin.

Dr. Zorab Aloian

Birêz Dr. Aloian,

Bi destûra te min daxuyaniya PENa Kurd gihande Komela Dêrên Cîhanê. Niha ez dixwazim serê xwe bidim ber xwe û baweriyên xwe nîşan bidim.

1. Berî her tiştî ez digel Daxuyaniya PENa we heşmend im. Minê jî ev destnîşan bikira, eger ez Kurd bûma (bi nijada xwe ez Kurd nînim, lê kî dizane, belkî giyanê min ji we ye?).

2. Nêrînên min:

2.1. Li gor baweriya min, çîna siyasetmedar û artêşa Tirk hên jî ji şopên kevin rizgar nebûne. Ev şopên çewsandina kesên din e. Berê, wana Ermenî û Êzdî çewisandin, paşê Kurdên Elewî (bi taybetî li Dêrsîmê), niha jî destê xwe dirêjî hemû Kurdan dikin. Tenzîmeta nebixêr Enver Bey û Telaet Paşa anîne hole, nûjenikirn jî (modernization) Mistefa Kemal kire serkêş. Lîsteya kesên weha dirêj e, lê lîsteya cangoriyên (qurbanên) wan hên dirêjtir e. Ji ber ku tawanbariya wan nayê cezakirin, şikênandina gelê Kurd berdewam e. Serkêşên dilreşan bi zorê Kurdan dikin koçber û diavêjine bajaran, zimanê wan ji wan distînin û zordariya xwe hişktir dikin (çawa wana karibû Kurdên Êzdî di nav sînorên xwe de tunebikin!)

Helbet ew zordariya xwe xerabtir dikin, çûnke kes ji çavên wan re nayîne? Xelasî li ku ye? Kampaniyeke çapemeniyê, ragihandina saziyên wisa giring mîna Komela Dêrên Cîhanê û navgînên xwedîdeng.

2.2. Desthilatdarên kevineperest li Iranê di hilbijartina îsal de rê nedan, ku dîtinên cuda bêne gengeşekirin. Ji bona wan mînakên serbestiyê - heta cejinên di navbera cîranan de, firelayanî û azadiya ramanê – gunehên herî mezin in. Di çavên wan de, gunehên wisa dibin sedema mirina rejîmê.

2.3. Gava ez li Iaqê mêze dikim, ez beneke dîrokî jêderdixim. Terrorîstên Beesî û cerdewanên Ensar el-Islam û Ensar el-Sunna ji serdema Ebbesiyan û Lu’lu’ derneketine. Bedr ed-Dîn Lu’lu’ - atabegê Selcuk yê Mûsilê - gora Şêx Adî, yê ku pêşewayê Êzdiyan bû, heram kiribû. Niha paşiyên Lu’lu’ bê şerm û fedî fermanan didin: “Yê Êzdiyan yan Kakeyan bikuje, wê pêşkêşa Xwedê werbigire!”. Yek ji giringtirîn sedemên tevkujia Helebcê jî ev bû, ku niştecihên vê bajarê Kurd bûn û beşek ji wan Kakeyî bûn.

2.4. Bûyerên Sûriyê ez wisa şirvoe dikim: Nakokiyeke mezin di navbera  komên Beesiyan de heye. Ev komên curbicur nûnerên van beş û çînan in, yên ku êdî nikarin li hev bên. Lê ji bo ku şerê wan xuya neke, ew hemû dane pey “bizinê qurbanê”. Ne dûr e, ku gelê Kurd ji bona wan bûye “bizinê qurbanê”. Belkî vijaka heralî ya li dijî Kurdan bi xwe amadekariyek e: Amadekariyek ji bo dijwartirîn zordariya li himber hemû hemwelatiyên Sûriyê.

Bi silavên dilsozekî gel û çanda we,

Ricardo Gustavo Espeja

Córdoba, Argentîna

25.03.2004