Kitabê cigêrayox, nuştox û ziwanzanê ma yo namdar Malmîsanijî İlk Kürt Gazetesi Kurdistan’ı Yayımlayan Abdurrahman BEDIRXAN (1868 – 1936) Weşanxaneyê Vateyî ra vejîya.

Rojnameyê Kurdistanî ke edebîyatê nuştekî yê kurdan de destpêkê yew qonaxê muhîmî yo, 1898 de Qahîre de hetê Mîqdat Midhet Bedirxanî ra weşanîyabi. Badê panc hûmaranê verênan weşana rojnameyî hetê Abdurehman Bedirxanî ra welatanê cîya-cîyayan de dewam bîbî.

Mîqdat Midhet û Abdurehman Bedirxan kam î?

No kitabo ke hetê cigêrayox, nuştox û ziwanzanê ma yo namdar Malmîsanijî ra bi xebatêka pake û bi baldarî amade bîyo û weşanîyayo de hem derheqê rojnameyê Kurdistanî de hem derheqê Mîqdat Midhet û Abdurehman Bedirxan de, bi taybet zî derheqê Abdurehman Bedirxanî de gelek malumatê muhîmî estê.

Qedexekerdişê kitabanê kurdkî ke ma vanê qey ronayîşê komara Tirkîya ra dest pêbîyo, ma nê kitabî ra musenê ke, esas, no qedexekerdiş serra 1906 ra dest pêbîyo. Eynî serre, Îstanbul ra surgunkerdişê bi hezaran kurdî; Kürd Meşrutiyet Mektebi ke serra 1908 de Îstanbul de abîbî, ardimê maddî ke hetê Wezaretê Perwedeyê Osmanî ra ro nê wendegeyî bîyo, derheqê nê meselayan de belgeyê ke reya verêne û desto yewin ra weşanîyênê zî nê kitabî de ca gênê. Hewna, gelek belgeyê arşîvan, nuşte û kartpostalê Abdurehman Bedirxanî, gelek malumat û belgeyê ke çimeyanê cîya-cîyayan ra bi baldarî û bi xebatêka dergûdila arêdîyayê, nê kitabî de weşanîyayê. Bi wendişê kitabî nê tarîxê ma ra destpêkê sedserra 19. hîna weş fehm beno.