Hûmara vîst û newine (29.) ya kovara Vate vejîya. Se ke yeno zaneyene kovara VATE safî bi kurdîya zazakî (kirmanckî) bîy yewendes serrî ke hetê Grûba Xebate ya Vateyî ra amade bena û Îstanbul de ginena çape ro. Kovara VATE, hem seranserê Kurdistanê Vakurî de, hem Kurdistanê Başûrî de û hem zî Ewropa de vila bena.

Na hûmare de netîceyê Kombîyayîşê Standardîzekerdişê Kirmanckî yê 15. ke Dîyarbekir de virazîyabi, rîpel 4 ra hetanî 33 de weşanîyayo. Dima ra yew roportajo ke Seyîdxan KURIJî wezîrê kulturî yê Hukûmatê Kurdistanê Başûrî Felekeddîn KAKEYÎ reyde kerdo, weşanîyayo. Sernameyê roportajî “KURDÎ NIKA DINYA DE NETEWEYA EN GIRD A KE BÊ DEWLET A Û WELATÊ AYE AMEYO PARÇEKERDIŞ” o. Serredaktorê kovara VATEyî Malmîsanijî zî yew nuşteyo bi sernameyê “ÇEND NAMEYÊ KÊNEK Û LAJEKAN” nuşto. Malmîsanijî, kirmanckî de nameyê merdiman û hawayê vatişê înan, yanî hawayê telafuzkerdişê nameyan zî nawito. Nuşte de 131 tene nameyê kênekan û 78 tene zî nameyê lajekan estê. Yewna nuşteyo derg zî yê Mehmed Selîm UZUNî yo. Sernameyê nuşteyî “GRÛBA XEBATE YA VATEYÎ Û STANDARDÎZEKERDIŞÎ KIRMANCKÎ (ZAZAKÎ)” yo. Nuşte derheqê standardîzekerdişê ziwanî de yo. Yew nuşteyo bîn zî Sînan SUTPAKî nuşto ke sernameyê ey “WENDENE Û NUŞTENA ZIWANÊ DAYÎKE ŞIMITENA ŞITÊ DAYÎK A” yo û nuşte de muhîmîya ziwanê dayîke ameyo munaqeşekeriş. Sernameyê nuşteyê Munzur ÇEMî zî “ZÎYARA CONAGE SER O ÇEND ÇEKUYΔ yo, ke tede derbarê yew zîyara Kurdistanî ya ke dewa Conage ya Gêxî de ya, malumatan dano. Yew nuşteyo muhîm zî yê Celadet Alî BEDIRXANî yo. Nuşte derheqê kirmanckî û Mewludê Usman Efendîyê Babijî de yo. No nuşte verê cû kovara HAWAR, hûmara 23 de weşanîyayo, nika Malmîsanijî alfabeya erebkî ra tarnskrîbeyê latînî kerdo. Yew nuşte zî yê Yekta H. OKÇU yo. Sernameyê nuşteyî “DAYÊ BARAVE Û SANIKÊ AYE” yo. Yekta, nuşteyê xo de derbarê dapîra xo de qisey kerdo û yew zî sanika dapîra xo tede nuşta. Roşan LEZGÎNî zî derheqê Kombîyayîşê Dîyarbekirî de yew nuşte nuşto.

Yew hîkayeya Murad CANŞADî ya bi nameyê “AHAA BIRADERO XOŞEWÎST”, yew hîkayeya Huseyîn KARAKAŞî ya bi nameyê “DEJÊ PEYÊ DÊSAN” û yew zî hîkayeya Mehmud NÊŞITEyî ya bi nameyê “HUSO DERDEWER” na hûmare de weşanîyayê.