Sersaxî – Dr. Cemşîd Bender çû rehmetê

Îsmaîl Beşîkçî 

Di jîyana miletên bindest yên ku ziman, kultur û nasnameya wan hatîye înkarkirin û tunekirin de rola roşibîran gelek mezin e. Roşinbîr bi helwêsta xwe, bi nivîsên xwe, bi axaftinên xwe dikin ku dîrok û ziman û nasnameya miletê bindest derkeve rojevê. Dr. Cemşîd Bender bi kitêba xwe “Kürt Tarihi ve Uygarlığı”, di vê rêyê de bi nivîs û konferansan mifayeka gelek mezin gihandîye pêşketina manewî ya kurdan. Ji vî layî ve, wekî mînak, di warê avakirin û berdewamîya Enstîtuya Kurdî ya Stenbolê de roleka wî ya girîng hebûye. Kitêbên wî yên bi navê “Kürt Uygarlığında Alevilik”, “12 İmam ve Alevilik”, “Kürt Mutfak Kültürü ve Kürt Yemekleri”, “Kürt Mitolojisi – I” û “Kürt Mitolojisi – II” gelek balkêş in.

Dr. Cemşîd Bender derbareyê van mijaran de li Ewropayê û Tirkîyeyê li bajarên cur bi cur konferans dane, beşdarîya panelan kirîye. Kitêbên Dr. Cemşîd Benderî, nivîsên wî, dê her dem mîna çavkanîyên hêja her bimînin. Dê gelê kurd her dem Cemşîd Benderî bi rêzdarî bi bîr bîne.

Ez bi rêzdarî kek Cemşîdî bi bîr tînim. Ez bona malbat û heskirîyên wî ku niha di nav xemgînîyeka mezin de ne, sebrê hêvî dikim. 9 Nîsan 2008       

Îsmaîl Beşîkçî

çapkirin