Kovara Vate Hûmara 32. Vejîya

Roşan Lezgîn

 

Hûmara 32. ya kovara Vateyî vejîya. Na hûmare de çend nuşteyê serekeyî derheqê mergê endamê Grûba Xebate ya Vateyî Wisif Hêlinijî de yî. Wisif Hêlinijî roja 16.10.2008 de paytextê Fransa Parîs de netîceyê qezayêkê trafîkî de dinyaya xo bedilnaybî û 23.10.2008 de dewa xo Qelbînê Pîranî de defn bibi.   Nuşteyo verên yê kovare bi sernameyê “Wisifê Ma Dinyaya Xo Bedilnaye” hetê serredaktorê kovara Vateyî Malmîsanijî ra nusîyayo. Nuşteyê diyine bi sernameyê “Wisif Hêlinij Cewherêko Nimite Bi” hetê J. Îhsan Esparî  ra nusîyayo. Nuşteyê hîrine bi sernameyê “Cenazeya Wisif Hêlinijî Qelbîn De Defn Bîye” hetê Roşan Lezgînî ra nusîyayo. Nameyê nuşteyê tewr peyênî yê Wisif Hêlinijî ke na hûmara Vateyî de weşanîyayo “Pepuk” o. Wisif Hêlinij, nê nuşteyê xo de derheqê teyrê pepukî, efsaneyê pepukî û mîyanê folklorê ma de teşbîhanê pepukî de malumatan dano.   Na hûmare de netîceyê Kombîyayîşê Şîyêsine yê Grûba Xebate ya Vateyî rîpelê 26. ra hetanî 70. weşanîyayo. Netîceyê nê kombîyayîşî ra, sere de “Termê Teknolojîyê Enformasyonî” ca gênê. Nê qismî de 103 maddeyan de termê teknolojîyê komputere û enformasyonî tesbît bîyê û bi tirkî, îngilîzkî û kirmanckî nusîyay. Dima zî çekuyê bînî ke nê kombîyayîşî de munaqeşe bîyê ca gênê.   Na hûmare de şîîrê W. K. Merdimîn, Alî Beytaş, Daîmî Bîngol, Newzat Dodanij, Huseyîn Burke, Turgut Ersoy û Sîyamend Mîrvanî weşanîyayê. Malmîsanijî derheqê kirmancanê Modanî (Motkanî) de Îshaq Tepeyî reyde yew roportajo muhîm kerdo û peynîya metnê roportajî de yew ferhengekê fekê Modanî (Motkanî) weşanayo. Malmîsanijî nê ferhengekî de çekuyê kirmanckîya Modanî tirkî reyde îzeh kerdê. Yewna roportaj zî Seyîdxan Kurijî muzîsyen Mikaîl Aslanî reyde kerdo.

 

 

Nuşteyo bi sernameyê “Kirmanckî De Romanî” û “Sêwaz De Golê Kirmancan: Qerebel” hetê Huseyîn Karakaşî ra nusîyay. Nuşteyo bi sernameyê “Vateyî Rê” hetê H. Granî ra nusîyayo. Hîkaya bi sernameyê “Biza Kole Asnawî Kena” hetê Mehmud Nêşiteyî ra û hîkaya bi sernameyê “Pîre” hetê Nurulah Burcunî ra nusîyaya. Nuşteyo bi sernameyê “Ez Qewmê Xo Ra Terseno” hetê Alî Beytaşî ra nusîyayo. Murad Canşad û Serdar Bedirxanî îdyomê ke arêkerdê, na hûmare de weşanayê.  Çîyê folklorîkî yê arêkerdey hetê Bîlal Nêribij, Mehmed S. Uzun, N. Celalî, Seleh Pak, H. Giranî ra arêdîyayê û na hûmare de weşanîyay.

 

Nuşteyê derheqê yadkerdişê serrgêra şehîdbîyena 25. ya Necmedîn Buyukkayayî hetê Mehmud Nêşiteyî ra nusîyaya. Xebera derheqê Panelê Mela Ehmedê Xasî ke Dîyarbekir de virazîya bi, hetê Roşan Lezgînî ra û xebera konferansê ke hetê Îstîtutê Ziwan û Kulturê Kirmancî (Zaza) ke Berlîn de derheqê kurdanê ucayî de virazîyayo hetê Wusênê Gestmerdeyî ra nusîyay.

 

_____________

Adresa waştişî: Vate Yayınevi, Katip Mustafa Çelebi Mah. Tel Sok. No: 18 Kat: 3 Beyoğlu / İstanbul  Tel: 0 212 244 94 14, E-post: kovaravate@yahoo.com

Seba Dîyarbekirî Adresa Waştişî: Vate Dergisi Diyarbakır Bürosu; Lise 2. Sokak Adalet Apt. Kat:1 No:3 Yenişehir / Diyarbakır Tel: 0 412 223 03 69

çapkirin