ÇÎROKA ‘DARÊN ŞIKESTÎ’

SALIHÊ KEVIRBIRÎ, salihkevirbir@hotmail.com

Diyarî bo dayîka min Fatima Elî û tevahiya ‘darên şikestî!’

‘Çiqas jinê çê hene

Qismetê mêrê kotî ne!’

Dibêje Dengbêjê Beriya Jorîn

‘Darên şikestî ne jin!’

Gotina Pîrika min Şefîqeya Ferman e

‘Lê..!’ dibêje:

‘Jin, ji bo vê yekê ne!’

Ji dayîka xwe wisa dîtiye

‘Şikestîbûn qedera me ye keça min!’

Dibêje ji metika min a 16 salî re

Qeder e

Razîbûn jê re divê

Hê jî ‘Xecê û Besê qîzên bavê xwe ne!’

Dema Xwelîserê Bav ‘çog daniye û qîz anîne!’

Dayika Qirik li çayxaneya binê gund

Li ser ‘dam’ û ‘kişikê’ bûye ne wisa?

Wey ‘xweliya heft gundan’ li serê me

‘Serê me bixwe’ ‘mêranî’ya me!

Me zû ji bîr kir

Gava ‘pariyek nanê tisî’

‘Misqalê zêr’ bû li nêv mal

Ew dayîk bû di ‘Qûşxaneya Çimbilşikestî’ de

Kevirên reş ên hewşê dikeland:

‘Delalên min, nîv saetên din

Goşt û birinca me çêdibe!’

Heft nîv saet dida dû hev

Bi zikê birçî çav diket xewan

Dayîk li ber serê ‘sexelan’

We got bavê zarokan?

Li dîwana axe û keyalerên

Gundên cînar

Dikeland ‘çaya qaçax’ û ‘qehweya tehl’!

Zarok ligel dayîka dilsoz

Birçî û perîşan

Pîrê êdî bes e!

Bes bêje çîroka ‘darên şikestî’

Jinexasiya Xatê ya diya Silêmanê Mistê

Canejiniya Perîxana dayîka ‘Ehmed’ û ‘Evdile’

Edaleta Şemê ya diya Filîtê Quto

Ji min re bibêje

Ne ‘darên şikestî’

‘Gulên pişkivî’

Bîne ziman ji kurê xwe re!