Yekem kovara populer a kurdan ‘Esmer’ ku bi rasernavê ‘Populer Kürtür’ (ne populer kultur) li Stenbolê, bi awayeke perîyodîk, mehane weşana xwe dike û di nava kovargerî û weşangeriya Tirkiyeyê de ciheke girîng digire, bi jimareya berfanbarê derket pêşberî xwendevanên xwe.

Kovara navborî di hejmara 24’an de bi navê ‘İki Sürgün Yürek Buluştu: Ahmet Kaya-Orhan Kotan’ (Du dilên mişextî hatin cem hev: Ahmet Kaya-Orhan Kotan) dosyayeke têrnaverok amade kiriye. Nivîsarên dosyayê ji hêla kesên bi navê Ferzende Kaya, Hasîp Kaplan, Gulten Kaya, Ayşe Onal, Erdogan Aydın û Mehmet Zahîr ve hatine amade kirin. Her wiha nivîsareke Gorbihuşt Mehmûd Baksî ku li ser Orhan Kotan nivîsî bû, di nava dosyayê de cih ji xwe re terxan kiriye. Şayanê gotinê ye ku ‘Esmer’ di her hejmarê xwe de bi awayeke berfireh cih dide dosyayeke portreyî. Heger em behsa çend navan bidin ku heta niha wekî portre di kovarê de hatine nivîsandin ev in: Musa Anter, Şivan Perwer, Cegerxwîn, Yilmaz Guney, Ahmed Arif, Ahmet Kaya, Mehmed Uzun, Yilmaz Erdogan, Gulîstan Perwer, Ciwan Haco, İbrahîm Tatlises, Mahsun Kirmizigul, Mehsuni Şerif, Hulya Avşar, Yildiz Tîlbe û Orhan Pamuk. Kovarê, du hejmar berê jî, bi awayeke dewlemend dosyayek li ser ‘Zargotina Kurdî û Dengbêjiyê’  pêşkêşî xwendevanên xwe kiribû.

Ahmet Kahraman, Sunay Akın, Ahmet Tulgar, Ragıp Duran, Salihê Kevirbirî, İsmail Beşikçi, Sinan Karahan, Evrim Alataş, Firat Cewerî, Cezmî Ersoz, Selîm Temo, Muslum Yucel, A. Kadir Konuksever, Ali Nesin, Ahmet Ilgaz, Halim Bahadır û kemal Siyahhan di hejmara ku behsa wê hatiye kirin de bi berhemên xwe cih girtine.