REŞQEDER

SALIHÊ KEVIRBIRÎ, salihkevirbiri@hotmail.com

Min navê wê pirsî

Li ber reşetaqa mizgefta gundê şêxan

Li destan satila avê

Li eniya serê 18 salî

Qermiçokên pîrên navsere

Min navê wê pirsî

Bi gotinên fediyok

Ligel lebatên lêvên lerzok

Bes Xwedayê Teala

Ferşa limêja Sofî Xelîlê Dîn

Û Qulateyna binê gund

Şahidê van kelam û nezeran bûn

Min navê wê pirsî

Li piyan terebzanên peritî

Min li halê wê pirsî

Bi heft dilên şewitî

Keça Tirpançiyê Welatê Serhedê

Bejnbilinda binê çadira raserî şikeftê

Meşwerdeka enîqemer

Rakir serê xwe ji ber xwe

Negeriya zar û ziman

Bersivand bi çavên kildayî:

‘Reşqeder e navê min..!’

Reşqeder...

Tebax 2004, Stenbol