Enstîtuya Kurdî ya li Stenbolê kongreya xwe ya 8’emîn pêk anî

SALIHÊ KEVIRBIRÎ / STENBOL, salihkevirbiri@hotmail.com; Enstîtuya Kurdi ya li Stenbolê kongreya xwe ya 8’emîn pêk anî. Di kongreya ku 24.10.2004’an de li Kadikoya Stenbolê li Avahiya Egitim-Sen Şaxa Duyemîn pêk hat de, zêdetirî 70 endamên enstîtuyê beşdarî kir û di dawiya kongireyê de bi dengên xwe rêveberiya nû hilbijart.; Rûniştina kongreyê ji bo tevahiya şehîdên Şoreşa Kurdistanê yek deqe bi rabûna ser piyan destpê kir. Paşê jî dîwana ku ji Çeto Ozel, İbrahim Gurbuz û Şîrîn Tunç pêk dihat bi giraniya dengan hate hilbijartin.; Di kongreyê de xebatên rêveberiya kevin hatin eşkerekirin, rapora darayî (madî) hate pêşkeşkirin û li ser van xalan gelek endam mafên axaftinê wergirtin û gilî-gazin, pêşniyaz û daxwazên xwe rave kirin. Her wiha danezana Enstîtuya Kurdî ya li Stenbolê bi bi zimanê kurdî zaravayên kurmancî-zazakî û bi zimanê tirkî li tevahiya endaman hate belavkirin û li dîwanê ev danezan bi zimanê kurmancî û zazakî (dimilkî) ji mêvan û endaman re hate xwendin.; Şayanê gotinê ye ku li avahiya ku kongre lê pêk hat de, tabloyên Ehmedê Xanî, logoya Enstîtuya Kurdî û pankartên bi rengê ‘nasname; ziman, çand û rûmet e, li rûmeta xwe xwedî derkeve!’ balê dikişand ser xwe.; Cîgirê Serokê Giştî yê DEHAP’ê Osman Ozçelik, rêveberên Komeleya KAYY-DER’ê û Endamên Desteya Rêveber ya Bîroya Navenda PEN’a Kurd ya Stenbolê, ligel komek ji endamên çapemeniya kurd li kongreya navborî hazir bûn.; Di encama kongireyê de Şefîk Beyaz careke din weki serokê Enstîtuyê hate hilbijartin. Rêveberî (5 kes) û Senatoya Enstîtuyê (18 kes) ji van navan pêk hatin:

Endamên Birêvebiriya Enstîtuya kurdî ya Stenbolê:
Cuma Çiçek, Qahir Bateyi, Şirin Tunç, Yaşar Eroglu û Hasan Çeter.

Endamên Senatoya Enstîtuya Kurdî ya Stenbolê:

Zana Farqînî, Salihê Kevirbirî, Mulazim Ozcan, Mele Reşid İrgat, Kerem Soylu, Mele İsmet Kiliçaslan, Mele Celalettin Yoyler, Mehmet Şafi Ekinci, Kadirye Alptekin, İbrahim Gurbuz, Hasan Baraçkiliç, Eşref Doganer, Deniz Gündüz, Deniz Çiftçi, Çeto Ozel, Cemal Piranij, Arzu Civak û Alattin Aktaş.

Di kongireya ku têrnaverok derbas bû de, peyama Navenda PENa Kurd ku bi imzeya cîgirê serokê Navenda PENa Kurd Mustefa Reşîd û peyama Enstîtuya Kurdî ya li Brûkselê ku bi îmzeya Derwêş M. Ferho ve hatibûn şandin, hatin xwendin.; Enstîtuya Kurdî ya li Stenbolê di 18’ê Nîsana 1992’yan de ji hêla kesên wekî İsmail Beşikçi, Musa Anter, Evdirehman Durre, İbrahim Gurbuz, İsmet Şerif Wanlî û çend navên din ve hate damezirandin. Enstîtuya ku heta niha bi awayeke fermî ji hêla dewletê ve nehatiye naskirin, gelek caran bi tehdeyî û zordariyan re rûbirû maye. Lê gelek balkêş e ku enstîtuya ku hê jî bi awayekî fermî nehatiye pejirandin, car çêbûn ku ji hêla Serokomariya Tirkiyeyê ve bo civînên rêxistinên sivîl hate dawetkirin. Ev dikeve sala 13’an ku Enstîtuya Kurdî ligel zext û zordariyan li ser piyan e û ji bilî girtina du mehan, her deriyê wê vekirî maye!

çapkirin