Nameyeke vekirî ji Şemdînê Dengbêj re........

 ‘Salihê Qubînê û Zahiro hetka min bir...!’

 SALIHÊ KEVIRBIRÎ, salihkevirbiri@hotmail.com

Kekê Şemdîn rojxêra te dikim û bi vê nameyê gilî û gazincên xwe rapêşî bejn û bala te dikim. Birayê min qey li Stenbola xopan ji bilî min tu kes tunebû ku te bela van dengbêjan xiste stûyê min. Mûrad Batkî li vir bû, Ehmedê Neco li vir bû. Hema te ji wan re bigota…!

Çawa ku ez miqaledar, menejer û organîzatîtorê Dengbêj Salihê Qubînê û Zahiroyê Mûşî bim, ligel ku ev hefteyeke qûn li min çiriya û zik jî li min qetiya, ez nagihîjim lez û beza wan.

Mala min ne ava ku min pêşniyara te qebûl kir û ez bûm navbeynkarê te û wan! Ev bîst roj in, vexwendnameya ku te ji bo wan şandiye, hatiye. Serî lê bidin, wê di nava sê rojan de vîzeya xwe bistînin û werin Brûksela xopan da ku tu bi wan re rêzebernameyan çêbikî û ez jî ji wan xelas bibim. Lê tu were ‘Vî kerî di vê bihûrî de derbas bike…!’ Hatine vê derê xwe ji her tiştî şûştine. Geşt û gera li kûçe û kolanên Îstîklalê gelek li xweşa wan çûye ku her du bi hev re dibêjin: “Pereyên mirov hebe, kes nan û av ji me nexwaze, hema ji şerqa sibê heta mîla mexrebê mirov li wî serî heta vî serî li vê kolanê pîyase bike çiqas xweş e…” Êêê keçikên delal dîtine!

Malnemîratan, ji bilî serdan û danûstandinên li Navenda Çanda Mezopotamya, Azadiya Welat, Jiyana Rewşen, Weşanên Sî, Weşanên Pêrî, Demos û Orîon Cafeyê; ji min daxwaza dîtina gundiyên xwe yên ku li Turkcell û Vakiflar Bankasiyê dixebitin, dikin. Ya Rebbî gunehê min çi bû? Hema maye ku bibêjin em herin Vakkoyê cem dîtina Vîtalî Hakko!? Wê rojê emê biçûna Jiyana Rewşenê cem Kawa Nemir da ku ewraqeke wan ji tirkî wergerîne ingilîzî. Heta ez ji avdestxanê hatim, hew min dît ku gihîştine Brahîmê Sûryanî û bazara zêr, marq û dolaran dikin. Mamê Brahîm hey dibêje: “Marq li piyasê nemane, ji dêvla wan ve ‘euro’ derketine…!” jî, nexêr feyde nake.  Ez behecîm bi van re hevalê Şemdîn. Niha pereyên wan hebe, li zora min naçe! Ez zêde serê te neêşînim, em ji dikana Brahîm derketin ber bi tunelê ve diçin. Zahirê me qîrek da xwe: “Ho! Kazim Abê nassin qurban…?”

Tu nabêjî di rê de Kazim Kartal dîtiye, gazî wî dike. 78 deqe li ser piyan jî pê re sohbet gerand. Çi ye, di fîlmê Ganî Rizgan Şawata ya bi navê ‘Doz’ de bêyî ku dîmenên wî hebin kilamekê gotiye. Di nava sohbetê de, 6 kilam jî bi mêrikê reben re da guhdarîkirin. Kazimê reben î ku levzek bi kurdî nizane, bi hinceta dagirtina Akbîla xwe, xwe ji Zahirê min û te xelas kir…!

Neyse ez zêde serê te neêşînim. Em çûn Jiyana Rewşenê ango bi navê xwe yê nû Rewşennameyê. Hêviya min ew e ku karê wan rojek berî rojekê biqede da ku ez jî serê xwe deynim û têra dilê xwe razêm. Hefteyeke misqalek xew bi çavên min neketine! Bi saya serê kilam û stranên wan em her şev li tax û kolaneke Stenbolê ne û min êdî riya mala xwe ji bîr kiriye. Li Rewşenê nehiştin ku xebatkar karê xwe bikin. Ji kilamên wan di avahiya 5 qatî de ji bilî Mûslûm Yûcel û xebatkarên kovarê tu kes neman. Xwezî gava kilam digotin tu li cem me bûya û te bidîta. Bi navê Makîko keçikeke feqîrokî yê japon heye. Tê Nûrê cend levzan kurdî hînî wê dike. Qubînî destê xwe avêtiye stûyê keçikeke reben, kilama ‘Evdalê Zeynê’ dibêje. Zahiro jî jê dexesiya dike û bi awayekî acizbûyî zoq li nîvê çavê Qubînî dinihêre. Xwedê topa îlahî li Zahir Kayan jî bide. Ew jî serê lehzê çawa ku tu karê wî tunebe dibêje: “Mamoste, hûn bi çend varyantan vê kilamê dibêjin?” Kuro lawo dev ji varyantan berde, bila karê xwe bikin.

Heta me xwe ji wê derê avêt derve, min pişta stûyê xwe bi çavê serê xwe dît. Pêr telefon dane min. Ez çûm ku li kokteyla ‘Orîon Café’yê ne û dest bi kilaman kirine. Ha ji xwe ev kêm bû. Nizanim kê ev der şanî wan daye? Tirsa min ev e ku sibê bibin mûdavîmê Qehwexaneya ‘Qaçax Çayê’ Axirî kilamên xwe qedandin. Hew me dît ku polîs, qûnde û reşikên Beyogluyê li ser serê me civiyane!

Hevalê Şemdîn çîroka min û dengbêjên te ev e. Ji kerema xwe re ku me vîzeya wan stand û hatin, êdî wan bi ser me de neşîne. Helaka me birin babê min. Tu li wir ji Cahît Merwan re bibêje, ezê jî ji vir e-maîlek jê re bişînim belkî karek di ‘Sêla Sar’ de ji wan re peyda bike.

Silav li te û mêvanên te dikim…

Azadiya Welat Hejmar 329  (18-24 Gulan 2002)

Hîwa (24 Gulan 2002)