PENA KURD CAREKE DIN ROJÊN WÊJEYÎ PÊKANÎN

SALIHÊ KEVIRBIRÎ / HAMMINKELN-WESEL, salihkevirbiri@hotmail.com  

 
PEN’a Kurd ku yek ji endamên PEN’a Navneteweyî ye, li gorî şert û mercên giran û derfetên teng hewl dide xwe ku salê çend caran nivîskar, helbestvan û rojnamegerên kurd bîne cem hev.

Cara dawî li bajarokê Hamminkelnê yê nêzî bajarê Weselê ku li sînorê Almanya-Holandayê ye civîneke wêjeyî pêk hat. Li cihê civînê bixwe mêvanan li wir razan, li wir xwarin û vexwarin. Beriya ku ez hinek behsa vê civînê bikim, dixwazim li ser du civînên berê çend agahiyên kurt bidim:

Ez bixwe yek ji wan kesan im ku sala par beşdarî civînên PEN’ê ku li Mülheim Ruhr (Almanya) û Dresdenê (Almanya) bûm. Civîna li Mülheim Ruhrê bi boneya bîranîna Qedrî Can pêk hatibû. Di vê civînê de ligel bi dehan nivîskarên kurd, kurê helbestvanê gewre Qedrî Can jî beşdar bûbû û hestên xwe yên dildarî bi me re parve kiribû. Di civîna navborî de beşdarên civîna sê rojî, hin beş ji berhemên xwe xwendibûn, maweyên xweş bi hev re derbas kiribûn û dema stêrkan xwe li asîmanan geş dikir jî, awaz û sewtên ‘kurmancî’, ligel dîlana ‘gewr’ li der û dorê olan dida.

Herçî civîna li Dresdena Rojavayê Almanyayê bû, bûbû qada hevnasiya nivîskarên kurd û alman. Ev civîn jî her wekî civîna berê ‘kurdewar’ û ‘têrbêje’ bû. Li vî bajarê kevnar jî zêdetirî 25 nivîskarên kurd û alman li hev qesidîbûn, bi zimanê hev êş û janên xwe bi hev didan nasandin.

Em werin ser atmosfera civîna dawî. Her wekî me ragihand, civîn li bajarokê Hamminkelnê, di navbera rojên 7-8-9’ê vê mehê (sermawez) pêk hat. Civîn bi boneya ‘Sedsaliya Cegerxwîn’ hatibû sazkirin. Li ser vê mijarê jî pêk hat. Roja yekem gotar û gengeşî li ser Seydayê Nemir Cegerxwîn bûn. Roja duyem û sêyem jî, beşdarên civînê li dorhêla 20 deqeyan ji berhemên xwe; çi pexşanî, çi nesrî xwendin. Di navbera de jî gengeşî li ser van xwendinan dihatin kirin.

Şayanî gotinê ye ku em mafên Serekê PEN’a Kurd Dr. Zerdeşt Haco, Cîgirê Serek Mustefa Reşîd û Sekreterê PEN’a Kurd Dr. Zorab Aloian bidin ku bi serfirazî civîn birêve birin. Mala wan ava!

Beriya ku ez navên beşdarên civînê rave bikim, dixwazim xweşhalî û spasiya xwe bi taybetî bo xweşawazên kurd Şêrîn Perwer, Hozan Birader, Şehrîbana Kurdî û Hozan Xebat Şakir bikim. Ev navên muhteber, ligel beşdariya xwe ya li civînan şevên me jî bi awaz, stran û têlên tembûrên xwe geş kirin.

Ez bawer im di nivîsareke wisa de em navên nivîskar, helbestvan, rojnameger û hunermendên xwe yên beşdar nedin, emê neheqiyeke mezin li wan bikin..! 

Nivîskar, helbestvan û rojnamegerên ku beşdarî li civîna PEN’ê kiribûn ev bûn:

Dr. Zerdeşt Haco, Mustefa Reşîd, Dr. Zorab Aloian, Salihê Kevirbirî, Eskerê Boyîk, Kakşar Oremar, Seydayê Dilbirîn, Bedirxan Epozdemîr, Qado Şêrîn, Muruvet Cacim, Huseyin Duzen, Ferîd Xan, Xiyasedîn Zaroj Stêrk, Rukiye Ozmen, Merwan Alî, Enwer Ahmed, Emer Cengiz, Nazîf Telek, Fûad Sîpan, Sîrwanê Hecî Berko, Stranbêj Şêrîn Perwer, Hozan Biraderê Mûsikî, Nedîm Tolan, Stranbêj Şehrîbana Kurdî, Stranbêj Xebat Şakir û Şêrgo Ehmed.