Destên Xwe Bikişînin...!

Ahmet Aktaş

Van rojan bûye weke benişt ketiye devê Receb û Baykal, ew dibêje destê xwe bikişîne ji ser arteşê, yê dî lê vedigerîne dibêji destê xwe bikişîne ji ser arteşê.

Hilbet herdu jî xwedê giravî van gotinên xwe, li ser gotina Başbug yê li civîna çapemeniyê gotibû; destê xwe ji ser leşkeriyê bikişînin, dikin û xwedê giravî li xwe danaynin ku bêjin ji me re hatiye gotin, yek davêje ser yê din.

Bi vê gotinê tenê jî na rewestin, rêze gotinên xwe dirêj dikin û dibêjin; destê xwe ji dadigehê bikişînin, destê xwe filan cihî û bêvan cihî bikişînin!

Ji xwe li Tirkiyeyê her tişt tevlihev bûye, van kesên ji malê re siyasetmedar û rêberên welat û dewletêne; ya bi zanebûn an jî ji naçarî, hîn pirtir avê şêlû/gemarî dikin.

Weke gotineke gelek tê gotin li Tirkiyeyê tine bîra mirovan, dibêjin; destê kê di bêrîka kê de ye ne diyar e.

                        *  *  *

Li Tirkiyeyê û Herêmê rewşa siyasî roj bi roj dijwartir dibe. Her wiha rewşa civakî û aborî jî her diçe aloztir dibe.

Dema temambûna biryara şernekirina gerilla hindik maye.

Ji alî dewletê ve nîşanên bersiveke erînî hîn jî xuya nake, ji bilî hinek helwestên Gul.

Tengavbûna Dewletê gelek eşkere xuya dibe. Nakokiyên navbêna hêzan, him xwebixwe û him dijberî hev dijwartir bûye; siyasî, leşkerî, aborî, sendîkayî û hwd.

Li gel Iraqê, nexweşiyên li Pakistanê û Afganistanê dewam dikin.

Li nava Iranê tevlihevî û pevçûn zêdetir dibe, herwiha helwesta DYA û bi taybetî siyaseta Israil li dijî Ahmedînijad dijwartir dibe. Bêgûman van bûyerên herêmê bandora xwe ji nêzîz ve li ser rewşa siyasî ya Tirkiyeyê dike.

                        *  *  *

Li Tirkiyeyê, ya rast ne ewe ku hêzên siyasî û sivîl bêjin; bila destê xwe ji ser Arteşê bikişînin. Berovajî, ya rast ewe herkes bêje; divê Arteş destê xwe ji ser siyasetê û bi gişti ji ser civakê bikişîne, dev ji wê xwedantiya dewletê berde.

Lê belê li Kurdistanê, Arteş, divê ne bi tenê destê xwe jê bikişîne, lingê xwe jî, tankê xwe, topê xwe, teyarê xwe, bi kurtî wî mejiyê xwe yê qirêj bi tevayî ji nava welatê me, ji nava miletê me bikişîne.

Ahmet Aktaş

6.7.2009

çapkirin